જામનગર: જામનગર શહેરના મહિલા પોલીસ સ્ટેશન પર રવિવારે વહેલી સવારે એક તોતિંગ વૃક્ષ અચાનક ધરાશાયી થતાં પોલીસ સ્ટેશનના પ્રવેશદ્વારને ભારે નુકસાન પહોંચ્યું હતું. ઘટનામાં બિલ્ડિંગના જૂના સ્ટ્રક્ચરના નળિયા તેમજ લાકડાના ભાગ તૂટી પડ્યા હતા.

વૃક્ષ પડતાં પોલીસ સ્ટેશનને નુકસાન ધરાશાયી થયેલા વૃક્ષના કારણે મહિલા પોલીસ સ્ટેશનના પ્રવેશદ્વારનો ભાગ ક્ષતિગ્રસ્ત બન્યો હતો. વૃક્ષનું કદ મોટું હોવાથી મકાનના આગળના ભાગને નોંધપાત્ર નુકસાન થયું હોવાનું જાણવા મળ્યું છે.

ઘટના વહેલી સવારે બનતા પોલીસ સ્ટેશનમાં અવરજવર ઓછી હતી, જેના કારણે કોઈ જાનહાનિ કે ઇજાની ઘટના સર્જાઈ ન હતી. જોકે, પ્રવેશદ્વારને નુકસાન થતાં પોલીસ કર્મચારીઓને બહારથી જ કામગીરી સંભાળવાની ફરજ પડી હતી.

ઘટનાની જાણ થતાં જ જામનગર મહાનગરપાલિકાની ગાર્ડન શાખાની ટીમ તાત્કાલિક સ્થળ પર પહોંચી હતી. ટીમ દ્વારા ધરાશાયી થયેલા વૃક્ષને હટાવવાની કામગીરી હાથ ધરવામાં આવી હતી અને વિસ્તારને સુરક્ષિત બનાવવાના પ્રયાસો કરવામાં આવ્યા હતા.

જૂના મકાનો અને વૃક્ષોની સલામતી અંગે ઉઠ્યા સવાલ  થયા છે. આ ઘટનાને પગલે સ્થાનિકોમાં ચિંતા વ્યાપી છે. ખાસ કરીને જૂના સરકારી મકાનો અને તેની આસપાસ આવેલા વૃક્ષોની સ્થિતિ અંગે ચર્ચાઓ શરૂ થઈ છે. ભવિષ્યમાં આવી ઘટનાઓ ન બને તે માટે તંત્ર દ્વારા જરૂરી પગલાં લેવા માંગ ઉઠી છે.

નુકસાનનું મૂલ્યાંકન શરૂ હાલ સંબંધિત વિભાગો દ્વારા ઘટનાથી થયેલા નુકસાનનું મૂલ્યાંકન કરવામાં આવી રહ્યું છે. પ્રાથમિક તબક્કે પોલીસ સ્ટેશનના પ્રવેશદ્વાર અને મકાનના કેટલાક ભાગોને નુકસાન પહોંચ્યાનું સામે આવ્યું છે.