જામનગર: જામનગર પોલીસની પેરોલ ફર્લો સ્ક્વોડે ઓપરેશન કારાવાસ-2 અંતર્ગત 12 વર્ષથી ફરાર ગેંગરેપના આરોપીને ઝડપી પાડી મહત્વની સફળતા મેળવી છે. આરોપી પેરોલ દરમિયાન ફરાર થઈ ગયો હતો અને છેલ્લા 12 વર્ષથી કાયદાની પકડથી દૂર રહ્યો હતો.

મળતી માહિતી મુજબ, વર્ષ 2012માં પારસ ઉર્ફે ધોરિયાએ ગેંગરેપની ગંભીર ઘટનાને અંજામ આપ્યો હતો. આ કેસમાં અદાલતે તેને આજીવન કેદની સજા ફટકારી હતી. જોકે, પેરોલ પર છૂટ્યા બાદ આરોપી ફરાર થઈ ગયો હતો.

જામનગર પોલીસના પેરોલ ફર્લો સ્ક્વોડે આરોપીને શોધવા માટે હ્યુમન ઇન્ટેલિજન્સ અને ટેકનિકલ સર્વેલન્સનો સહારો લીધો હતો. લાંબા સમયથી ચાલતી તપાસ અને ચોક્કસ બાતમીના આધારે આખરે આરોપીનું લોકેશન ટ્રેસ કરવામાં આવ્યું હતું.

પોલીસે સાબરમતી રેલવે સ્ટેશન વિસ્તારમાં કાર્યવાહી કરીને આરોપીને ઝડપી પાડ્યો હતો. આરોપીની ધરપકડ બાદ આગળની કાયદેસરની કાર્યવાહી હાથ ધરવામાં આવી છે.

જામનગર પોલીસ દ્વારા હાથ ધરાયેલા ઓપરેશન કારાવાસ-2 અંતર્ગત ફરાર કેદીઓ અને આરોપીઓને પકડવાની ઝુંબેશ ચાલુ છે, જેમાં આ કાર્યવાહી મહત્વપૂર્ણ સફળતા માનવામાં આવી રહી છે.