જામનગર: વસ્તી ગણતરીની કામગીરીને લઈને રાષ્ટ્રીય શૈક્ષણિક મહાસંઘે વહીવટી તંત્ર સામે ગંભીર આક્ષેપો કર્યા છે. મહાસંઘના જણાવ્યા અનુસાર હાલમાં ઘણા શિક્ષકો બૂથ લેવલ ઓફિસર (BLO) તરીકે ફરજ બજાવી રહ્યા છે, ત્યારે તેમને વસ્તી ગણતરીની વધારાની કામગીરી પણ સોંપવામાં આવતા તેઓ ભારે કામના બોજ હેઠળ દબાઈ રહ્યા છે.

એકસાથે બે મહત્વની જવાબદારીઓ નિભાવવી મુશ્કેલ મહાસંઘે જણાવ્યું છે કે કોઈપણ વ્યક્તિ એકસાથે બે મહત્વપૂર્ણ અને જવાબદારીભરી કામગીરી અસરકારક રીતે કરી શકે તેમ નથી. શિક્ષકોને BLOની ફરજ સાથે વસ્તી ગણતરીની જવાબદારી આપવાથી બંને કામગીરીની ગુણવત્તા પર અસર થવાની શક્યતા છે.

ભેદભાવપૂર્ણ નીતિ અપનાવવાનો આક્ષેપ સંઘે વહીવટી તંત્ર પર ભેદભાવપૂર્ણ નીતિ અપનાવવાનો પણ આક્ષેપ કર્યો છે. તેમના જણાવ્યા મુજબ અમુક ચોક્કસ કેડરના કર્મચારીઓને આ કામગીરીમાંથી બાકાત રાખવામાં આવ્યા છે, જ્યારે શિક્ષકો પર વધારાનો બોજ નાખવામાં આવ્યો છે, જે યોગ્ય નથી.

વગદાર કર્મચારીઓના ઓર્ડર રદ કરાયા હોવાનો દાવો રાષ્ટ્રીય શૈક્ષણિક મહાસંઘે વધુમાં જણાવ્યું કે અગાઉ વસ્તી ગણતરી માટે જે કર્મચારીઓના ઓર્ડર બહાર પાડવામાં આવ્યા હતા, તેમાંના આશરે 26 થી 30 જેટલા વગદાર અથવા લાગવગ ધરાવતા કર્મચારીઓના ઓર્ડર પાછળથી રદ કરવામાં આવ્યા હતા. જેના કારણે અન્ય શિક્ષકો અને કર્મચારીઓ પર વધારાનું કામ આવી પડ્યું છે.

કેટલાક કર્મચારીઓને 600 સુધીના ઘરોની જવાબદારી મહાસંઘના જણાવ્યા અનુસાર કેટલાક કર્મચારીઓને 400થી 600 જેટલા ઘરોની વસ્તી ગણતરીનું કામ સોંપવામાં આવ્યું છે. આટલા મોટા વિસ્તારની જવાબદારીને કારણે કામગીરી પૂર્ણ કરવામાં મુશ્કેલીઓ ઉભી થઈ રહી છે અને કર્મચારીઓ પર માનસિક તેમજ શારીરિક દબાણ વધી રહ્યું છે.

કામગીરીમાં સમાનતા અને પારદર્શિતાની માંગ રાષ્ટ્રીય શૈક્ષણિક મહાસંઘે વહીવટી તંત્રને કામગીરીના વહેંચણમાં સમાનતા અને પારદર્શિતા જાળવવા અપીલ કરી છે. સાથે જ શિક્ષકો પરનો વધારાનો બોજ ઘટાડવા અને તમામ કેડરના કર્મચારીઓ વચ્ચે કામગીરીનું યોગ્ય વિતરણ કરવાની માંગ પણ ઉઠાવી છે.