Iran Israel War: આખું પશ્ચિમ એશિયા યુદ્ધના કહેરમાં છે. ત્યારે ઇઝરાયલ અને યુનાઇટેડ સ્ટેટ્સે સંયુક્ત રીતે પહેલા ઇરાન પર હુમલો કર્યો હતો. ત્યારબાદ ઇરાને બધા પડોશી દુશ્મન દેશોને નિશાન બનાવ્યા હતા. આ દરમિયાન યુએસ રાષ્ટ્રપતિ ડોનાલ્ડ ટ્રમ્પે તેમના સાથીઓને મદદ માટે અપીલ કરી છે. જો કે, બ્રિટિશ વડાપ્રધાન કીર સ્ટાર્મર ઇરાન યુદ્ધમાં સામેલ ન થવાના તેમના વલણ પર અડગ રહ્યા છે.

હકીકતમાં બ્રિટિશ વડાપ્રધાન કીર સ્ટાર્મરે એક મોટો અને કઠિન નિર્ણય લીધો છે. વડાપ્રધાન સ્ટાર્મરે જણાવ્યું હતું કે, બ્રિટન ઈરાન વિરુદ્ધ અમેરિકા અને ઇઝરાયલ દ્વારા કોઈપણ લશ્કરી અભિયાનમાં ભાગ લેશે નહીં. તેમણે સ્પષ્ટપણે કહ્યું હતું કે, આ અમારી લડાઈ નથી. 

બ્રિટન દબાણ હેઠળ હતું
તેમનો નિર્ણય એવા સમયે આવ્યો જ્યારે બ્રિટન પર નાટો સાથી દેશો દ્વારા આ યુદ્ધમાં જોડાવવા માટે ખૂબ જ દબાણ હતું. વડાપ્રધાને સ્પષ્ટ કર્યું કે, તેઓ દેશની સેનાને બ્રિટનના રાષ્ટ્રીય હિતોને નુકસાન પહોંચાડે તેવા કોઈપણ આક્રમક કાર્યવાહીનો ભાગ બનવા દેશે નહીં. ઇતિહાસનો ઉલ્લેખ કરતા તેમણે કહ્યું કે, બ્રિટને ઇરાક યુદ્ધ જેવી ભૂતકાળની ભૂલોમાંથી ઘણું શીખ્યું છે અને તે ભૂલોનું પુનરાવર્તન કરવા માંગતું નથી.