Iran America Tension: પશ્ચિમ એશિયામાં ચાલી રહેલા યુદ્ધના ઉકેલ માટે તેહરાન અને વોશિંગ્ટન વચ્ચે શાંતિ વાટાઘાટોના બીજા રાઉન્ડ અંગે ચાલી રહેલી અનિશ્ચિતતા વચ્ચે ઈરાનના વિદેશમંત્રી અબ્બાસ અરાઘચી સોમવારે રશિયા પહોંચ્યા. આ મુલાકાત દરમિયાન તેમણે ઇસ્લામાબાદની તેમની યાત્રાને સફળ ગણાવી હતી અને કહ્યું કે, તેમણે પાકિસ્તાનના ટોચના નેતૃત્વ સાથે અર્થપૂર્ણ પરામર્શ કર્યા છે. ત્રણ દિવસના સમયગાળામાં ઇસ્લામાબાદની તેમની બીજી મુલાકાત બાદ અરાઘચી રશિયા પહોંચ્યા હતા. ઇસ્લામાબાદમાં તેમણે પાકિસ્તાનના આર્મી ચીફ ફિલ્ડ માર્શલ અસીમ મુનીર સાથે મુલાકાત કરી હતી.

સેન્ટ પીટર્સબર્ગ પહોંચ્યા પછી અરાઘચીએ તેમની ટેલિગ્રામ ચેનલ પર શેર કરેલા એક વીડિયો સંદેશમાં જણાવ્યું હતુ કે, ‘અમે પાકિસ્તાનમાં અમારા મિત્રો સાથે અર્થપૂર્ણ ચર્ચા કરી હતી. આ મુલાકાત સફળ રહી હતી. અમે અમારી તાજેતરની બેઠકોના પરિણામોનું મૂલ્યાંકન કર્યું અને વાટાઘાટો કઈ દિશામાં આગળ વધી શકે છે, તેમજ તે કઈ પરિસ્થિતિઓ હેઠળ આગળ વધી શકે છે તેની ચર્ચા કરી હતી.’

પશ્ચિમ એશિયામાં સંઘર્ષના ઉકેલ માટે અમેરિકા અને ઈરાન વચ્ચે વાટાઘાટોના બીજા રાઉન્ડનો ઉલ્લેખ કરતા અરાઘચીએ ટિપ્પણી કરી હતી કે, ‘વાટાઘાટોમાં પ્રગતિ થઈ છે.’ ઈરાનની સત્તાવાર સમાચાર એજન્સી IRNA અનુસાર, અરાઘચીએ ઉમેર્યું કે, "વાતચીતના પ્રથમ રાઉન્ડ દરમિયાન કેટલીક પ્રગતિ થઈ હોવા છતાં, યુ.એસ. પક્ષના વલણને કારણે - ખાસ કરીને તેની અસંગત માંગણીઓ અને ખામીયુક્ત અભિગમને કારણે વાટાઘાટો તેમના ઉદ્દેશ્યો પ્રાપ્ત કરવામાં નિષ્ફળ ગઈ છે."

"તેથી, વર્તમાન પરિસ્થિતિની સમીક્ષા કરવા માટે પાકિસ્તાનમાં અમારા મિત્રો સાથે સલાહ લેવી જરૂરી માનવામાં આવી છે." અરાઘચીએ નોંધ્યું કે, પાકિસ્તાનની તેમની મુલાકાત ઈરાન સામે યુ.એસ. અને ઇઝરાયલને સંડોવતા સંઘર્ષ સંબંધિત વિકાસની સમીક્ષા કરવા માટે એક મૂલ્યવાન તક તરીકે સેવા આપી હતી. તેમણે વિશ્વાસ વ્યક્ત કર્યો કે "બંને રાષ્ટ્રો વચ્ચે પરામર્શ અને સંકલનની આ પ્રક્રિયા અત્યંત મહત્વપૂર્ણ સાબિત થશે." અરાઘચી સોમવારે વહેલી સવારે સેન્ટ પીટર્સબર્ગના પુલકોવો એરપોર્ટ પર પહોંચ્યા હદા, જ્યાં તેમનું સ્વાગત રશિયન અધિકારીઓ અને રશિયામાં ઈરાનના રાજદૂત કાઝેમ જલાલી દ્વારા કરવામાં આવ્યું હતું.