Iran America Tension: સોમવારે ઈરાનના વિદેશમંત્રી અબ્બાસ અરાઘચીએ રશિયાના રાષ્ટ્રપતિ વ્લાદિમીર પુતિન સાથે મુલાકાત કરી હતી. બેઠક બાદ રાષ્ટ્રપતિ પુતિને ઈરાનને મજબૂત ખાતરી આપી હતી. તેમણે કહ્યું હતું કે, રશિયા ઈરાન અને મધ્ય પૂર્વના શ્રેષ્ઠ હિતમાં કંઈ પણ કરવા તૈયાર છે. રશિયા આ ક્ષેત્રમાં શાંતિ લાવવા માટે શક્ય તેટલું બધું કરશે.

રશિયાની રાજ્ય સમાચાર એજન્સી,TASS અનુસાર, રાષ્ટ્રપતિ પુતિને અરાઘચીને કહ્યું કે, ઈરાની લોકો તેમની સાર્વભૌમત્વ માટે બહાદુરીથી લડી રહ્યા છે. TASSએ પુતિનને એમ પણ કહ્યું કે, તેમને આશા છે કે, આ મુશ્કેલ સમયમાંથી બહાર નીકળ્યા પછી ઈરાન શાંતિ મેળવશે.

અબ્બાસ અરાઘચીએ કહ્યું કે, ઈરાન-રશિયા સંબંધ એક વ્યૂહાત્મક ભાગીદારી છે, જે મજબૂત થતી રહેશે. રશિયન રાષ્ટ્રપતિએ એ પણ ભાર મૂક્યો કે, મોસ્કો ઈરાન સાથે તેના વ્યૂહાત્મક સંબંધો ચાલુ રાખશે. કતાર, સાઉદી અરેબિયા, ઓમાન અને પાકિસ્તાનના નેતાઓ સાથે મુલાકાત કર્યા પછી અરાઘચી રશિયા પહોંચ્યા હતા. એવું માનવામાં આવે છે કે, તેઓ સોદાની કેટલીક શરતો સાથે લાવ્યા છે અને તેમના પર પુતિનનો ટેકો માગી રહ્યા છે.

આ બેઠક કેમ મહત્વપૂર્ણ છે? 
ઈરાનના વિદેશમંત્રી અબ્બાસ અરાઘચીની પુતિન સાથેની મુલાકાત અત્યંત મહત્વપૂર્ણ માનવામાં આવે છે. આ બેઠકનો ઉદ્દેશ્ય બંને દેશો વચ્ચે લશ્કરી અને વ્યૂહાત્મક સંકલનને વધુ મજબૂત બનાવવાનો છે. આ બેઠક એવા સમયે થઈ રહી છે, જ્યારે રશિયા અને ઈરાન યુરોપ અને મધ્ય પૂર્વમાં ચાલી રહેલા યુદ્ધોમાં એકબીજાને સીધી મદદ કરી રહ્યા છે. બંને દેશોએ તાજેતરમાં એકબીજાને મહત્વપૂર્ણ ગુપ્ત માહિતી અને ખાસ કરીને શાહેદ-પેટર્નવાળા ઘાતક ડ્રોન પૂરા પાડ્યા છે.

સમસ્યા ક્યાં અટવાઈ છે?
આ દરમિયાન અમેરિકન મીડિયા આઉટલેટ એક્સિઓસે દાવો કર્યો છે કે, ઈરાને અમેરિકાને હોર્મુઝ સ્ટ્રેટ ફરીથી ખોલવા અને ત્યારબાદ તેહરાનના પરમાણુ કાર્યક્રમ પર વાટાઘાટો કરવા માટે એક નવો પ્રસ્તાવ મૂક્યો છે. સૂત્રોના જણાવ્યા અનુસાર, આ નવો પ્રસ્તાવ પાકિસ્તાની મધ્યસ્થી દ્વારા અમેરિકાને આપવામાં આવ્યો હતો. એવો પણ દાવો કરવામાં આવી રહ્યો છે કે, ઈરાનમાં સુપ્રીમ લીડરની ટીમ અને સરકાર વચ્ચે મતભેદો છે. સરકાર સાથે સંકળાયેલા લોકો ઇચ્છે છે કે, યુદ્ધ ઝડપથી સમાપ્ત થાય, પરંતુ સુપ્રીમ લીડરની ટીમ બદલો લેવા માગે છે.