મુંબઈ: IPL 2027 પહેલા દિલ્હી કેપિટલ્સ (DC) અને લખનૌ સુપર જાયન્ટ્સ (LSG) વચ્ચે એક મોટી ટ્રેડ ડીલ સત્તાવાર રીતે પૂર્ણ થઈ છે. આ ટ્રેડ હેઠળ સ્ટાર વિકેટકીપર-બેટ્સમેન Rishabh Pant ફરી દિલ્હી કેપિટલ્સમાં પરત ફરશે, જ્યારે સ્પિનર Kuldeep Yadav આગામી સીઝનમાં લખનૌ સુપર જાયન્ટ્સની જર્સીમાં જોવા મળશે.

IPL ગવર્નિંગ બોડી દ્વારા મંગળવારે આ ટ્રેડની સત્તાવાર જાહેરાત કરવામાં આવી હતી.

પંતને 12 કરોડનું નાણાકીય નુકસાન

IPL 2025ના મેગા ઓક્શનમાં LSGએ ઋષભ પંતને 27 કરોડ રૂપિયામાં ખરીદ્યા હતા. જોકે ટ્રેડ બાદ પંત હવે 15 કરોડ રૂપિયાની સુધારેલી ફી સાથે દિલ્હી કેપિટલ્સમાં જોડાશે. એટલે કે પંતને કુલ 12 કરોડ રૂપિયાનું નાણાકીય નુકસાન સહન કરવું પડશે.

બીજી તરફ કુલદીપ યાદવ તેમની હાલની 13.50 કરોડ રૂપિયાની ફી સાથે જ લખનૌ સુપર જાયન્ટ્સમાં સામેલ થશે.

ફરી જૂની ટીમમાં પરત ફર્યો પંત

ઋષભ પંત 2016થી 2024 સુધી દિલ્હી કેપિટલ્સનો મહત્વપૂર્ણ ભાગ રહ્યા હતા. 2021થી 2024 દરમિયાન તેમણે ટીમની કેપ્ટનશિપ પણ સંભાળી હતી. તેમની કેપ્ટનશિપ હેઠળ દિલ્હીએ 43 મેચોમાંથી 23 જીત મેળવી હતી, જ્યારે 20 મેચોમાં હારનો સામનો કર્યો હતો.

પંતે દિલ્હી માટે કુલ 111 IPL મેચ રમી છે અને ફ્રેન્ચાઇઝીના સૌથી લોકપ્રિય ખેલાડીઓમાં ગણાય છે.

LSG માટે નિરાશાજનક રહ્યા હતા પંત

IPL 2025 અને 2026માં પંત લખનૌ સુપર જાયન્ટ્સના કેપ્ટન અને મુખ્ય બેટ્સમેન તરીકે રમ્યા હતા, પરંતુ તેમનું પ્રદર્શન અપેક્ષા મુજબ રહ્યું નહોતું. ત્યારથી જ તેમના દિલ્હી પરત ફરવાની અટકળો ચાલી રહી હતી, જે હવે સાચી સાબિત થઈ છે.

કુલદીપથી મજબૂત બનશે લખનૌનો સ્પિન હુમલો

કુલદીપ યાદવ માટે LSG IPLની ત્રીજી ટીમ બનશે. તેઓ 2016થી 2021 સુધી Kolkata Knight Riders સાથે રહ્યા હતા અને ત્યારબાદ 2022થી 2026 સુધી દિલ્હી કેપિટલ્સનો ભાગ રહ્યા હતા.

110 IPL મેચોમાં 112 વિકેટ લઈ ચૂકેલા કુલદીપના આગમનથી લખનૌની સ્પિન બોલિંગ વધુ મજબૂત બનવાની આશા છે.