અમદાવાદ: IPL 2026ની ફાઈનલ મેચ પહેલાં ક્રિકેટ ચાહકો માટે ચિંતાજનક સમાચાર સામે આવ્યા છે. ભારત હવામાન વિભાગ (IMD) દ્વારા અમદાવાદ સહિત ગુજરાતના અનેક વિસ્તારોમાં વરસાદ અને ગાજવીજની આગાહી સાથે યલો એલર્ટ જાહેર કરવામાં આવ્યું છે. આજે નરેન્દ્ર મોદી સ્ટેડિયમમાં ગુજરાત ટાઇટન્સ (GT) અને રોયલ ચેલેન્જર્સ બેંગલુરુ (RCB) વચ્ચે રમાનારી ખિતાબી ટક્કર પર વરસાદનું સંકટ મંડરાઈ રહ્યું છે.

અમદાવાદમાં વરસાદ અને ગાજવીજની આગાહી

IMDના તાજેતરના અનુમાન મુજબ 31 મે સવારે 8:30 વાગ્યાથી 1 જૂન સવારે 8:30 વાગ્યા સુધી અમદાવાદ સહિત ગુજરાતના વિવિધ વિસ્તારોમાં હળવાથી મધ્યમ વરસાદ અને ગાજવીજ સાથે છાંટા પડવાની શક્યતા છે. હવામાન વિભાગે અમદાવાદ જિલ્લામાં 50થી 60 કિમી પ્રતિ કલાકની ઝડપે પવન ફૂંકાવા, વીજળીના કડાકા અને વરસાદની શક્યતા વ્યક્ત કરી છે.

એક લાખથી વધુ દર્શકો પહોંચે તેવી સંભાવના

વિશ્વના સૌથી મોટા ક્રિકેટ સ્ટેડિયમ નરેન્દ્ર મોદી સ્ટેડિયમમાં IPL ફાઈનલ જોવા માટે એક લાખથી વધુ ક્રિકેટપ્રેમીઓ પહોંચે તેવી સંભાવના છે. ત્યારે હવામાનની આગાહીએ ચાહકો અને આયોજકો બંનેની ચિંતા વધારી દીધી છે.

વરસાદથી મેચ અટકે તો શું થશે?

IPLના નિયમો મુજબ જો વરસાદને કારણે મેચમાં વિક્ષેપ પડે તો મેચ પૂર્ણ કરાવવા માટે નિર્ધારિત સમય ઉપરાંત વધુમાં વધુ 120 મિનિટનો વધારાનો સમય આપવામાં આવી શકે છે. જો વરસાદ લાંબો સમય ચાલુ રહે તો ઓવરોમાં ઘટાડો કરીને મેચ રમાડવામાં આવી શકે છે. પરિણામ માટે બંને ટીમને ઓછામાં ઓછા 5-5 ઓવર બેટિંગ કરવાની તક મળવી જરૂરી છે.

ફાઈનલ માટે રિઝર્વ ડેની વ્યવસ્થા

IPL દ્વારા ફાઈનલ માટે 1 જૂનનો દિવસ રિઝર્વ ડે તરીકે રાખવામાં આવ્યો છે. જો 31 મેના રોજ વરસાદને કારણે મેચ શરૂ ન થઈ શકે અથવા પૂર્ણ ન થઈ શકે તો બાકીની મેચ રિઝર્વ ડે પર રમાડવામાં આવશે.

બંને દિવસ વરસાદ પડે તો કોણ બનશે ચેમ્પિયન?

જો દુર્લભ સંજોગોમાં મેચના દિવસ અને રિઝર્વ ડે બંને દિવસે વરસાદને કારણે કોઈ પરિણામ ન આવે, તો IPLના નિયમો મુજબ લીગ સ્ટેજના પોઈન્ટ ટેબલના આધારે વિજેતા જાહેર કરવામાં આવશે. IPL 2026ના પોઈન્ટ ટેબલમાં RCB પ્રથમ સ્થાને અને ગુજરાત ટાઇટન્સ બીજા સ્થાને હોવાથી આવી સ્થિતિમાં RCBને ચેમ્પિયન જાહેર કરવામાં આવશે.