અમદાવાદ: IPL 2026ની ફાઈનલ મેચને લઈને અમદાવાદ શહેરમાં સુરક્ષાના કડક બંદોબસ્ત ગોઠવવામાં આવ્યા છે. રવિવારે નરેન્દ્ર મોદી સ્ટેડિયમ ખાતે ગુજરાત ટાઇટન્સ (GT) અને રોયલ ચેલેન્જર્સ બેંગલુરુ (RCB) વચ્ચે રમાનારી હાઈ-વોલ્ટેજ ફાઈનલને ધ્યાનમાં રાખીને પોલીસ તંત્ર એલર્ટ મોડમાં આવી ગયું છે.

મેચ દરમિયાન હજારો ક્રિકેટપ્રેમીઓ સ્ટેડિયમમાં ઉમટી પડે તેવી શક્યતાને ધ્યાનમાં રાખીને સમગ્ર સ્ટેડિયમ અને આસપાસના વિસ્તારોમાં ચુસ્ત સુરક્ષા વ્યવસ્થા ગોઠવવામાં આવી છે. સુરક્ષા માટે અંદાજે 3,000 પોલીસ કર્મચારીઓ અને અધિકારીઓને તૈનાત કરવામાં આવ્યા છે.

સ્ટેડિયમના પ્રવેશદ્વારો, પાર્કિંગ ઝોન, VIP વિસ્તાર તેમજ આસપાસના મુખ્ય માર્ગો પર વિશેષ નજર રાખવામાં આવશે. મેચ દરમિયાન કોઈ અનિચ્છનીય ઘટના ન બને તે માટે CCTV કેમેરા, બોમ્બ સ્ક્વોડ, ડોગ સ્ક્વોડ અને ક્વિક રિસ્પોન્સ ટીમો પણ તૈનાત રહેશે.

અમદાવાદ પોલીસ, ટ્રાફિક પોલીસ અને અન્ય સુરક્ષા એજન્સીઓ વચ્ચે સતત સંકલન કરવામાં આવી રહ્યું છે. મેચ દરમિયાન ટ્રાફિક વ્યવસ્થા સુચારૂ રહે અને દર્શકોને કોઈ મુશ્કેલી ન પડે તે માટે ખાસ ટ્રાફિક પ્લાન પણ અમલમાં મૂકવામાં આવશે.

IPL 2026ની ફાઈનલને લઈને ક્રિકેટપ્રેમીઓમાં ભારે ઉત્સાહ જોવા મળી રહ્યો છે ત્યારે સુરક્ષા એજન્સીઓ દ્વારા પણ કોઈ કસર બાકી રાખવામાં આવી નથી.