IPL 2026 Final Moments: ઇન્ડિયન પ્રીમિયર લીગ (IPL) 2026ની ફાઇનલમાં રોયલ ચેલેન્જર્સ બેંગલુરુ (RCB) સામે ગુજરાત ટાઇટન્સ (GT)ની બેટિંગ નિરાશાજનક રહી હતી. ગુજરાતે 8 વિકેટ ગુમાવીને માત્ર 155 રન બનાવ્યા હતા. આ દરમિયાન ટીમની ઇનિંગ્સમાં 40 બોલ સુધી એક પણ બાઉન્ડ્રી જોવા મળી નહોતી, જે IPL ફાઇનલના ઇતિહાસમાં સૌથી લાંબો એવો સમય છે, જ્યારે કોઈ ટીમ બાઉન્ડ્રી ફટકારી શકી ન હોય.

આ પહેલાં આ અનિચ્છનીય રેકોર્ડ ડેકન ચાર્જર્સના નામે હતો. જેણે 2009ની ફાઇનલમાં RCB સામે સતત 35 બોલ સુધી કોઈ બાઉન્ડ્રી ફટકારી નહોતી. આ યાદીમાં મુંબઈ ઇન્ડિયન્સ (રાઇઝિંગ પુણે સુપરજાયન્ટ્સ સામે) અને પંજાબ કિંગ્સ (કોલકાતા નાઇટ રાઇડર્સ સામે) 29-29 બોલના અંતર સાથે સંયુક્ત રીતે ત્રીજા સ્થાને છે.

ગુજરાત ટાઇટન્સે પોતાની ઇનિંગ્સ દરમિયાન 5.5 ઓવરમાં છેલ્લી બાઉન્ડ્રી ફટકારી હતી. ત્યારબાદ ટીમને 12.4 ઓવરે જઈને ફરી બાઉન્ડ્રી મળી હતી. આ સમગ્ર ઇનિંગ્સમાં ગુજરાતે 15 ચોગ્ગા અને 3 છગ્ગા ફટકાર્યા હતા. નરેન્દ્ર મોદી સ્ટેડિયમ ખાતે રમાયેલી આ ફાઇનલમાં ગુજરાત ટાઇટન્સની શરૂઆત ખરાબ રહી હતી. ટીમને 2.2 ઓવરમાં કેપ્ટન શુભમન ગિલ (10) આઉટ થતાં પ્રથમ ઝટકો લાગ્યો હતો. તે સમયે ટીમના ખાતામાં માત્ર 22 રન જ હતા.

ત્યારબાદ ગુજરાત સતત અંતરે વિકેટ ગુમાવતું રહ્યું. જોસ બટલર (19) અને નિશાંત સંધૂ (20)એ ત્રીજી વિકેટ માટે 29 રનની ભાગીદારી નોંધાવી હતી. જ્યારે અરશદ ખાન (15) અને વોશિંગ્ટન સુંદર વચ્ચે પાંચમી વિકેટ માટે 26 રનની ભાગીદારી થઈ હતી. સાતમી વિકેટ માટે જેઝન હોલ્ડર અને વોશિંગ્ટન સુંદર વચ્ચે 27 રનની મહત્વપૂર્ણ ભાગીદારી નોંધાઈ હતી. ગુજરાત તરફથી વોશિંગ્ટન સુંદર સૌથી સફળ બેટ્સમેન રહ્યા હતા. તેમણે 37 બોલમાં 5 ચોગ્ગાની મદદથી અણનમ 50 રનની ઇનિંગ્સ રમી હતી.

RCB તરફથી રાસિખ સલામ ડારે સૌથી વધુ 3 વિકેટ ઝડપી હતી. જ્યારે ભુવનેશ્વર કુમાર અને જોશ હેઝલવુડે 2-2 વિકેટ લીધી હતી. કૃણાલ પંડ્યાએ 1 વિકેટ પોતાના નામે કરી હતી. ઉલ્લેખનીય છે કે, બંને ટીમો બીજો IPL ખિતાબ જીતવાના ઇરાદા સાથે મેદાનમાં ઉતરી હતી. ગુજરાત ટાઇટન્સે 2022માં પોતાનો પ્રથમ IPL ખિતાબ જીત્યો હતો, જ્યારે RCBએ 2025માં પ્રથમ વખત ટ્રોફી પોતાના નામે કરી હતી.