PM Modi Rajasthan Speech: વડાપ્રધાન નરેન્દ્ર મોદીએ રાજસ્થાનના જોધપુરમાં આયોજિત કાર્યક્રમ દરમિયાન પશ્ચિમ એશિયામાં સર્જાયેલી યુદ્ધની સ્થિતિ અને ભારતની ઊર્જા સુરક્ષા અંગે મહત્વપૂર્ણ નિવેદન આપ્યું હતું. તેમણે જણાવ્યું કે વૈશ્વિક સંકટ દરમિયાન ભારતે સમયસર યોગ્ય નિર્ણયો, અસરકારક વ્યૂહરચના અને મજબૂત કૂટનીતિના આધારે પરિસ્થિતિને સફળતાપૂર્વક સંભાળી હતી. PM મોદીએ કહ્યું કે પશ્ચિમ એશિયામાં યુદ્ધના કારણે સમગ્ર વિશ્વ પર અસર થઈ હતી. ખાસ કરીને સ્ટ્રેટ ઓફ હોર્મુઝ બંધ થવાથી ઊર્જા પુરવઠા પર ગંભીર સંકટ ઊભું થયું હતું. આવી સ્થિતિમાં ભારતે 40 જેટલા દેશોમાંથી ઇંધણ મેળવવાની વ્યવસ્થા કરીને દેશની જરૂરિયાતો પૂરી કરી હતી.

હોર્મુઝ જળમાર્ગ બંધ થતાં ઊભી થઈ હતી ચિંતાજનક સ્થિતિ
વડાપ્રધાને જણાવ્યું કે ભારત પોતાની LPG જરૂરિયાતના લગભગ 60 ટકા માટે આયાત પર નિર્ભર છે. પશ્ચિમ એશિયાની અસ્થિર પરિસ્થિતિ અને હોર્મુઝ જળમાર્ગમાં અવરોધને કારણે ઊર્જા પુરવઠા પર મોટો ખતરો ઉભો થયો હતો. પરંતુ કેન્દ્ર સરકારે સમયસર પરિસ્થિતિનું મૂલ્યાંકન કરીને વૈકલ્પિક સ્ત્રોતોમાંથી પુરવઠો સુનિશ્ચિત કર્યો હતો. તેમણે ભારપૂર્વક કહ્યું કે કેટલાક લોકો અફવાઓ ફેલાવવાનો પ્રયાસ કરી રહ્યા હતા, ત્યારે સરકાર દેશના હિતમાં સતત કામ કરી રહી હતી અને સંકટનો સામનો કરવા માટે અસરકારક પગલાં લઈ રહી હતી.

જોધપુર એરપોર્ટના નવા ટર્મિનલનું ઉદ્ઘાટન
પ્રવાસ દરમિયાન વડાપ્રધાન મોદીએ જોધપુર એરપોર્ટના નવા ટર્મિનલ બિલ્ડિંગનું ઉદ્ઘાટન પણ કર્યું હતું. આ આધુનિક ટર્મિનલથી પ્રદેશમાં પ્રવાસન, વેપાર અને રોજગારીને નવી ગતિ મળશે તેવી આશા વ્યક્ત કરવામાં આવી હતી.

HPCL રિફાઇનરી અંગે કોંગ્રેસ પર નિશાન
વડાપ્રધાને રાજસ્થાનમાં HPCL રિફાઇનરી પ્રોજેક્ટનો ઉલ્લેખ કરતા કહ્યું કે અગાઉની કોંગ્રેસ સરકારના અસહકારને કારણે આ પ્રોજેક્ટ લાંબા સમય સુધી અટવાયેલો રહ્યો હતો. જોકે રાજ્યમાં ડબલ એન્જિન સરકાર આવ્યા બાદ કામને ઝડપથી આગળ વધારવામાં આવ્યું અને આજે તેનું ઉદ્ઘાટન શક્ય બન્યું છે. PM મોદીએ જણાવ્યું કે દેશની ઊર્જા સુરક્ષા, આધુનિક ઇન્ફ્રાસ્ટ્રક્ચર અને કનેક્ટિવિટી વધારવા માટે સરકાર સતત મોટા પગલાં લઈ રહી છે, જેનાથી આગામી વર્ષોમાં દેશના વિકાસને વધુ વેગ મળશે.

વિરોધ પક્ષ પર આડકતરી ટિપ્પણી
વડાપ્રધાને પોતાના સંબોધનમાં વિરોધ પક્ષ પર નિશાન સાધતા કહ્યું કે જ્યારે કેટલાક લોકો અફવાઓ અને આશંકાઓ ફેલાવવામાં વ્યસ્ત હતા, ત્યારે સરકાર દિવસ-રાત સંકટનો સામનો કરવા માટે કામ કરી રહી હતી. તેમણે જણાવ્યું કે સરકાર દ્વારા લેવામાં આવેલા સંવેદનશીલ અને વ્યૂહાત્મક નિર્ણયોનો ઇતિહાસમાં ઉલ્લેખ થશે.

હોર્મુઝ સંકટ બાદ વધારાયું LPG ઉત્પાદન
PM મોદીએ જણાવ્યું કે ભારતની લગભગ 60 ટકા LPG જરૂરિયાત આયાત દ્વારા પૂર્ણ થાય છે અને તેમાંનો મોટો હિસ્સો ખાડી દેશોમાંથી હોર્મુઝ જળમાર્ગ મારફતે આવે છે. યુદ્ધના કારણે પુરવઠામાં વિક્ષેપ સર્જાતા સંકટ ઊભું થયું હતું. આ પરિસ્થિતિમાં સરકારે દેશની રિફાઇનરીઓને વધુ LPG ઉત્પાદન માટે તૈયાર કરી. જેના પરિણામે રોજનું LPG ઉત્પાદન 35 હજાર મેટ્રિક ટનથી વધીને 54 હજાર મેટ્રિક ટન સુધી પહોંચ્યું. કેટલીક એવી રિફાઇનરીઓને પણ LPG ઉત્પાદન માટે તૈયાર કરવામાં આવી, જેઓ અગાઉ આ પ્રકારનું ઉત્પાદન કરતી નહોતી.

11 લાખ નવા PNG કનેક્શન
સરકારે LPG પરનો ભાર ઘટાડવા માટે PNG (પાઇપ્ડ નેચરલ ગેસ) કનેક્શનનો વ્યાપ પણ વધાર્યો. PM મોદીના જણાવ્યા મુજબ ટૂંકા ગાળામાં 11 લાખથી વધુ નવા ઘરેલુ PNG કનેક્શન આપવામાં આવ્યા હતા, જેના કારણે ગેસ પુરવઠાની વૈકલ્પિક વ્યવસ્થા ઉભી થઈ.

LPG સિલિન્ડરના ભાવ નિયંત્રણમાં રાખ્યા
વડાપ્રધાને દાવો કર્યો કે વૈશ્વિક સંજોગોને જોતા ઘરેલુ LPG સિલિન્ડરની કિંમત 2,000 રૂપિયા સુધી પહોંચી શકે તેવી આશંકા હતી. તેમ છતાં સરકારના પ્રયાસોથી સામાન્ય ગ્રાહકોને હજુ પણ 950 રૂપિયાથી ઓછી કિંમતે LPG સિલિન્ડર મળી રહ્યો છે. જ્યારે ઉજ્જવલા યોજના હેઠળ લાભાર્થીઓને 650 રૂપિયાથી ઓછી કિંમતે ગેસ સિલિન્ડર ઉપલબ્ધ કરાવવામાં આવી રહ્યો છે.

₹1.06 લાખ કરોડના વિકાસકાર્યોની ભેટ
કાર્યક્રમ દરમિયાન PM મોદીએ પેટ્રોકેમિકલ્સ, શહેરી પરિવહન, રેલવે, માર્ગ વિકાસ, નવીનીકરણીય ઊર્જા અને વીજ ટ્રાન્સમિશન સહિતના ક્ષેત્રોને આવરી લેતી આશરે ₹1.06 લાખ કરોડની વિવિધ વિકાસ યોજનાઓનું લોકાર્પણ અને શિલાન્યાસ પણ કર્યું.