મુંબઈ: મોહરમના જુલૂસ દરમિયાન મોટી દુર્ઘટના સર્જવાની સંભાવના વચ્ચે મુંબઈ પોલીસે એક ગંભીર સાજિશને સમયસર નિષ્ફળ બનાવી છે. ભાયખલા અને જેજે વિસ્તારથી પસાર થતા મોહરમના જુલૂસ દરમિયાન લોકોમાં ‘દર્દમાંથી રાહત’ના નામે કેપ્સ્યુલ વહેંચી રહેલા એક શખ્સને પોલીસે ઝડપી પાડ્યો હતો. તપાસમાં સામે આવ્યું કે કેપ્સ્યુલમાં ઝેરી રસાયણ મિશ્રિત કરવામાં આવ્યું હતું.

મુંબઈ પોલીસના જણાવ્યા અનુસાર, પેટ્રોલિંગ દરમિયાન એક વ્યક્તિ શંકાસ્પદ રીતે લોકોમાં કેપ્સ્યુલ વહેંચતો અને વેચતો જોવા મળ્યો હતો. પૂછપરછ દરમિયાન તેની પાસે રહેલા સ્ટોકની તપાસ કરતાં ઝેરી પદાર્થથી ભરેલા કેપ્સ્યુલ મળી આવ્યા હતા. આરોપીની ઓળખ ફૈયાજ પ્રેમજી તરીકે થઈ છે, જે પુણેનો રહેવાસી અને વ્યવસાયે પેઇન્ટ વેપારી હોવાનું સામે આવ્યું છે.

14,900 ઝેરી કેપ્સ્યુલ જપ્ત
પોલીસ તપાસમાં ખુલ્યું છે કે આરોપીએ લગભગ 30 હજાર ખાલી કેપ્સ્યુલ અને 50 કિલો ઝિંક ફોસ્ફાઇડ (ઉંદર મારવાની ઝેરી દવા) મંગાવી હતી. જપ્ત કરાયેલા 14,900 કેપ્સ્યુલમાં પ્રતિ કેપ્સ્યુલ અંદાજે એક ગ્રામ જેટલું ઝેરી રસાયણ ભરવામાં આવ્યું હતું.

એક વ્યક્તિની તબિયત પણ બગડી
પોલીસે જણાવ્યું કે કેપ્સ્યુલનું સેવન કરનાર એક વ્યક્તિની તબિયત બગડી હતી. તેને પેટમાં દુખાવો અને ઉલ્ટીની ફરિયાદ થતાં હોસ્પિટલમાં દાખલ કરવો પડ્યો હતો. આ ઘટનાએ સમગ્ર મામલાની ગંભીરતા વધુ વધારી છે.

ઈરાન અને ઈરાક સાથેના કનેક્શનની તપાસ
તપાસ દરમિયાન વધુ એક ચોંકાવનારી માહિતી સામે આવી છે. આરોપી વર્ષ 2019થી 2025 દરમિયાન અનેક વખત ઈરાન અને ઈરાકની મુલાકાતે ગયો હતો. છેલ્લા એક વર્ષમાં જ તે 19 વખત ઈરાન અને ઈરાક ગયો હોવાનું પોલીસના પ્રાથમિક તારણોમાં સામે આવ્યું છે. તેના મોબાઇલ ફોન, ડિજિટલ રેકોર્ડ, બેંક ટ્રાન્ઝેક્શન અને સંપર્કોની વિગતવાર તપાસ ચાલી રહી છે.

હત્યાના પ્રયાસનો ગુનો નોંધાયો
ભાયખલા પોલીસે આરોપી સામે ભારતીય ન્યાય સંહિતા (BNS)ની વિવિધ કલમો હેઠળ ઝેર આપવાનો અને હત્યાના પ્રયાસનો ગુનો નોંધ્યો છે. પોલીસ હવે તપાસ કરી રહી છે કે આરોપી એકલો કામ કરતો હતો કે તેની પાછળ કોઈ મોટું નેટવર્ક અથવા સંગઠન સંકળાયેલું હતું.