Mumbai Ahmedabad Highway Accident: મહારાષ્ટ્રના પાલઘર જિલ્લામાં મુંબઈ-અમદાવાદ નેશનલ હાઈવે પર મંગળવારે વહેલી સવારે એક ભયાનક માર્ગ અકસ્માત સર્જાયો હતો. ટેમ્પો અને કન્ટેનર ટ્રક વચ્ચે થયેલી જોરદાર ટક્કરમાં ઓછામાં ઓછા 12 લોકોનાં ઘટનાસ્થળે જ મોત થયા હોવાનું જાણવા મળ્યું છે, જ્યારે 20થી વધુ લોકો ગંભીર રીતે ઇજાગ્રસ્ત થયા છે. પ્રાથમિક માહિતી મુજબ અકસ્માત એટલો ભયાનક હતો કે બંને વાહનોના આગળના ભાગના ચૂરા ઉડી ગયા હતા. અકસ્માત બાદ હાઈવે પર ચીસો અને અરેરાટી મચી ગઈ હતી. સ્થાનિક લોકો અને હાઈવે પોલીસ તાત્કાલિક ઘટનાસ્થળે પહોંચી ગઈ હતી અને રાહત-બચાવ કામગીરી શરૂ કરવામાં આવી હતી.

ઘાયલોની હાલત ગંભીર
અકસ્માતમાં ઇજાગ્રસ્ત થયેલા લોકોને તાત્કાલિક નજીકની હોસ્પિટલોમાં ખસેડવામાં આવ્યા છે. કેટલાક લોકોની હાલત અત્યંત ગંભીર હોવાનું ડોક્ટરોએ જણાવ્યું છે, જેના કારણે મૃતકોની સંખ્યામાં વધારો થવાની પણ શક્યતા વ્યક્ત કરવામાં આવી રહી છે.

અકસ્માતનું કારણ શોધી રહી છે પોલીસ
પોલીસ હાલ અકસ્માતના ચોક્કસ કારણોની તપાસ કરી રહી છે. પ્રાથમિક અંદાજ મુજબ ઓવરસ્પીડ અથવા ડ્રાઇવરની બેદરકારીને કારણે આ દુર્ઘટના બની હોવાની શક્યતા છે. મૃતકોની ઓળખ કરવાની પ્રક્રિયા પણ ચાલુ છે.

હાઈવે પર ટ્રાફિક જામ
અકસ્માત બાદ મુંબઈ-અમદાવાદ હાઈવે પર લાંબો ટ્રાફિક જામ સર્જાયો હતો. ક્રેનની મદદથી અકસ્માતગ્રસ્ત વાહનોને હટાવીને ટ્રાફિક ફરી શરૂ કરવામાં આવ્યો હતો. આ ઘટનાએ સમગ્ર વિસ્તારમાં શોકનો માહોલ સર્જી દીધો છે.