Delhi NCR Rain Alert: રાષ્ટ્રીય રાજધાની દિલ્હી અને આસપાસના NCR વિસ્તારમાં આખરે ચોમાસાએ જોરદાર દસ્તક આપી છે. દિલ્હી, ગુરુગ્રામ, નોઇડા, ગ્રેટર નોઇડા અને ગાઝિયાબાદ સહિતના વિસ્તારોમાં ભારે વરસાદ અને તેજ પવનને કારણે વાતાવરણમાં અચાનક ફેરફાર જોવા મળ્યો છે. લાંબા સમયથી ગરમી અને ભેજથી પરેશાન લોકો માટે વરસાદ રાહત લઈને આવ્યો છે.

મંગળવારે સવારે જ આકાશમાં ઘેરા કાળા વાદળો છવાઈ ગયા હતા અને અનેક વિસ્તારોમાં ઝરમર વરસાદ શરૂ થયો હતો. ત્યારબાદ ગુરુગ્રામ અને NCRના અનેક વિસ્તારોમાં ભારે વરસાદ સાથે તેજ પવન ફૂંકાતા વૃક્ષો ધરાશાયી થવાની ઘટનાઓ પણ સામે આવી છે. દિલ્હીના ઈસ્ટ ઓફ કૈલાશ વિસ્તારમાં એક મોટું વૃક્ષ અનેક વાહનો પર પડતા નુકસાન થયું હોવાનું જાણવા મળ્યું છે.

ભારતીય હવામાન વિભાગ (IMD)એ દિલ્હી-NCR માટે ઓરેન્જ એલર્ટ જાહેર કર્યું છે. વિભાગના જણાવ્યા અનુસાર આગામી કેટલાક કલાકોમાં 30થી 50 કિલોમીટર પ્રતિ કલાકની ઝડપે પવન ફૂંકાઈ શકે છે અને અનેક વિસ્તારોમાં હળવાથી મધ્યમ તેમજ ક્યાંક ભારે વરસાદ પડી શકે છે. હવામાન વિભાગે જણાવ્યું છે કે 2 જુલાઈએ દિલ્હીમાં સત્તાવાર રીતે દક્ષિણ-પશ્ચિમ ચોમાસાનું આગમન થયું હતું. હવે ચોમાસું ઝડપથી આગળ વધી રહ્યું છે અને ઉત્તર ભારતના રાજ્યોમાં સક્રિય બનતું જઈ રહ્યું છે.

IMDના અનુમાન મુજબ આગામી 2થી 3 દિવસમાં રાજસ્થાન, હરિયાણા, પંજાબ અને ઉત્તર અરબી સમુદ્રના બાકીના વિસ્તારોમાં પણ ચોમાસું આગળ વધશે. જેના કારણે ઉત્તર ભારતના મોટા ભાગના રાજ્યોમાં સારા વરસાદની સંભાવના વ્યક્ત કરવામાં આવી છે. વરસાદ અને ઠંડા પવનના કારણે દિલ્હી-NCRમાં તાપમાનમાં નોંધપાત્ર ઘટાડો નોંધાયો છે. હવામાન વિભાગના જણાવ્યા મુજબ તાપમાન 30થી 35 ડિગ્રી સેલ્સિયસની વચ્ચે રહેવાની શક્યતા છે, જેના કારણે લોકોને ગરમીથી મોટી રાહત મળશે.