નવી દિલ્હી: રાજધાની દિલ્હીમાં વાયુ પ્રદૂષણ ઘટાડવા અને ઇલેક્ટ્રિક વાહનોને પ્રોત્સાહન આપવા માટે દિલ્હી સરકારે નવી EV પોલિસી-2026ને મંજૂરી આપી છે. મુખ્યમંત્રી રેખા ગુપ્તાએ જાહેરાત કરી છે કે આ નવી પોલિસી 1 જુલાઈ 2026થી અમલમાં આવશે. સરકારનો હેતુ દિલ્હીમાં પ્રદૂષણ ફેલાવતા વાહનોની સંખ્યા ઘટાડીને ઇલેક્ટ્રિક વાહનોના ઉપયોગમાં વધારો કરવાનો છે.

નવી પોલિસી હેઠળ સૌથી મોટો લાભ BS-IV વાહનધારકોને મળશે. જો કોઈ વ્યક્તિ પોતાની BS-IV કાર સ્ક્રેપ કરાવીને નવી ઇલેક્ટ્રિક કાર ખરીદશે તો તેને સરકાર તરફથી ₹1 લાખ સુધીનું સ્ક્રેપિંગ ઇન્સેન્ટિવ આપવામાં આવશે. સરકારનું માનવું છે કે આ પગલાંથી જૂના અને વધુ પ્રદૂષણ ફેલાવતા વાહનો ધીમે-ધીમે રસ્તાઓ પરથી દૂર થશે.

મુખ્યમંત્રી રેખા ગુપ્તાના જણાવ્યા મુજબ નવી EV પોલિસી માત્ર ઇલેક્ટ્રિક કાર ખરીદવા માટે પ્રોત્સાહન પૂરતી મર્યાદિત નથી. સરકાર દિલ્હીમાં સંપૂર્ણ EV ઇકોસિસ્ટમ મજબૂત કરવા માટે પણ કામ કરશે. જેમાં ચાર્જિંગ સ્ટેશનોની સંખ્યા વધારવી, બેટરી ઇન્ફ્રાસ્ટ્રક્ચર વિકસાવવું, જાહેર અને ખાનગી ચાર્જિંગ સુવિધાઓને વિસ્તૃત કરવી અને ઇલેક્ટ્રિક મોબિલિટી વધુ સરળ બનાવવાનો સમાવેશ થાય છે.

દિલ્હી સરકારના અંદાજ મુજબ આગામી ચાર વર્ષમાં EV ક્ષેત્રમાં આશરે ₹15,000 કરોડનું રોકાણ આવશે. આ રોકાણ ચાર્જિંગ નેટવર્ક, બેટરી ટેક્નોલોજી, મેન્યુફેક્ચરિંગ યુનિટ્સ, સર્વિસ સેન્ટર્સ અને અન્ય સંબંધિત ક્ષેત્રોમાં કરવામાં આવશે. જેના પરિણામે હજારો લોકોને રોજગારીની નવી તકો પણ મળશે. સરકારનું કહેવું છે કે પ્રદૂષણ સામેની લડાઈમાં ઇલેક્ટ્રિક વાહનો મહત્વપૂર્ણ ભૂમિકા ભજવશે. વધતા વાહન પ્રદૂષણને નિયંત્રણમાં લેવા માટે આ નવી પોલિસી દિલ્હી માટે ગેમચેન્જર સાબિત થઈ શકે છે. નવી EV પોલિસી અમલમાં આવ્યા બાદ દિલ્હી દેશના સૌથી મોટા ઇલેક્ટ્રિક વાહન બજારોમાં વધુ મજબૂત સ્થાન મેળવી શકે છે. સાથે જ પર્યાવરણને અનુકૂળ પરિવહન વ્યવસ્થા તરફ એક મોટું પગલું માનવામાં આવી રહ્યું છે.