નવી દિલ્હી મધ્ય પૂર્વમાં ચાલી રહેલા તણાવને કારણે વૈશ્વિક સ્તરે કાચા તેલના ભાવમાં વધઘટ થવા છતાં ભારતનું અર્થતંત્ર મજબૂત સ્થિતિમાં છે. ઇન્ટરનેશનલ મોનેટરી ફંડ (IMF) એ તેના તાજેતરના 'વર્લ્ડ ઇકોનોમિક આઉટલુક' રિપોર્ટમાં જણાવ્યું છે કે ભારતે વૈશ્વિક અનિશ્ચિતતાઓનો અન્ય દેશોની સરખામણીએ વધુ સારી રીતે સામનો કર્યો છે.

જો કે, તેલના વધતા ભાવને ધ્યાનમાં રાખીને IMFએ વર્ષ ૨૦跑૬ માટે ભારતનો વિકાસ દર સહેજ ઘટાડીને ૬.૪ ટકા કર્યો છે (જે અગાઉના અંદાજ કરતાં ૦.૧ ટકા ઓછો છે). પરંતુ રાહતની વાત એ છે કે ઊર્જા સંકટ ઓછું થતાં આગામી વર્ષ ૨૦૨૭ માટે વિકાસ દરનો અંદાજ ૦.૨ ટકા વધારવામાં આવ્યો છે. મધ્યમ ગાળામાં ભારતનો ગ્રોથ રેટ ૬.૫ ટકા રહેવાની ધારણા છે.

IMFના રિસર્ચ વિભાગના વડા ડેનિજ ઇગનના જણાવ્યા અનુસાર, અપેક્ષા કરતાં વધુ સારી આર્થિક પ્રવૃત્તિઓ અને મજબૂત સ્થાનિક માગ ભારતીય અર્થતંત્રને ટેકો આપી રહી છે. એપ્રિલ સુધીના હાઇ-ફ્રીક્વન્સી ઇન્ડિકેટર્સ પણ દેશમાં મજબૂત આર્થિક ગતિવિધિઓ તરફ ઇશારો કરે છે.

નોંધનીય છે કે ભારત તેની જરૂરિયાતનું ૮૦ ટકાથી વધુ ક્રૂડ ઓઇલ આયાત કરે છે, જેના કારણે વૈશ્વિક ભાવોની અસર સ્થાનિક મોંઘવારી અને જીડીપી પર પડે છે. બીજી તરફ, વૈશ્વિક સ્તરે મોંઘવારીનો દર ૪.૭ ટકા રહેવાનો અંદાજ છે, પરંતુ આર્ટિફિશિયલ ઇન્ટેલિજન્સ (AI) માં વધી રહેલું રોકાણ ટેકનોલોજી ક્ષેત્રના દેશોને આર્થિક નુકસાનમાંથી બહાર લાવવામાં મદદ કરી રહ્યું છે.