Child Mental Health: આજકાલ ઘણા માતા-પિતાઓ માટે બાળકોનો ગુસ્સો, ચીડિયાપણું અને જીદ મોટો પડકાર બની રહ્યા છે. નાની-નાની વાતે રડવું, ગુસ્સે થઈ જવું અથવા પોતાની વાત મનાવા માટે જીદ પકડવી જેવી સ્થિતિઓ સામાન્ય બની ગઈ છે. આવી પરિસ્થિતિમાં માતા-પિતાને ઘણીવાર સમજાતું નથી કે બાળકને સમજાવવું, કડકાઈ દાખવવી કે થોડો સમય માટે એકલો છોડવો. જોકે, બાળ વર્તન નિષ્ણાતો અને ઘણા માતા-પિતાના અનુભવ મુજબ કેટલાક સરળ ઉપાયો બાળકોના ગુસ્સાને નિયંત્રિત કરવામાં અસરકારક સાબિત થઈ શકે છે.

1. સૌથી પહેલા માતા-પિતાએ પોતાના વર્તન પર ધ્યાન આપવાની જરૂર છે. જો બાળકના ગુસ્સાના જવાબમાં માતા-પિતા પણ ઉગ્ર પ્રતિક્રિયા આપે તો સ્થિતિ વધુ બગડી શકે છે. શાંતિથી વાત કરવાથી અને ધીરજ રાખવાથી બાળક પણ ધીમે-ધીમે શાંત રહેવાનું શીખે છે. બાળકો મોટાભાગે ઘરમાં જે જુએ છે તે જ અનુસરે છે.

2. બીજો મહત્વનો ઉપાય બાળકની વાત ધ્યાનથી સાંભળવાનો છે. ઘણા કિસ્સાઓમાં બાળકોને ઠપકો આપવાની જગ્યાએ તેમની લાગણીઓને સમજવાનો પ્રયાસ વધુ ફાયદાકારક રહે છે. જ્યારે બાળકને લાગે છે કે તેની વાતને મહત્વ આપવામાં આવી રહ્યું છે, ત્યારે તે પોતાની લાગણીઓ વધુ સારી રીતે વ્યક્ત કરી શકે છે.

3. નિષ્ણાતોના જણાવ્યા અનુસાર બાળકોને ગુસ્સા પર નિયંત્રણ મેળવવાની સરળ ટેક્નિક્સ પણ શીખવવી જોઈએ. જેમ કે ગુસ્સો આવે ત્યારે થોડી ક્ષણ માટે રોકાવું, ઊંડા શ્વાસ લેવા અને ધીમે-ધીમે ગણતરી કરવી. નિયમિત અભ્યાસથી બાળકો આ ટેવ વિકસાવી શકે છે અને તણાવભરી પરિસ્થિતિમાં પણ શાંત રહી શકે છે.

4. આ ઉપરાંત, બાળકોને ફિઝિકલ એક્ટિવિટી સાથે જોડીને રાખવું પણ ખૂબ જ જરૂરી છે. દોડવું, સાયકલ ચલાવવી, ફૂટબોલ અથવા અન્ય આઉટડોર રમતો બાળકોની વધારાની ઊર્જા અને તણાવને બહાર કાઢવામાં મદદ કરે છે. પરિણામે તેમનો મૂડ સુધરે છે અને ગુસ્સો ધીમે-ધીમે ઓછો થવા લાગે છે.

નિષ્ણાતોનું માનવું છે કે પ્રેમ, સમજણ અને યોગ્ય માર્ગદર્શન દ્વારા બાળકોમાં સકારાત્મક વર્તન વિકસાવી શકાય છે અને તેમના ગુસ્સા તથા જીદને અસરકારક રીતે નિયંત્રિત કરી શકાય છે.