વાંકડિયા વાળની સંભાળમાં ન કરો આ ભૂલો, જાણો વાળને નરમ અને મજબૂત રાખવાની સરળ રીતો

વાંકડિયા વાળ દેખાવમાં આકર્ષક હોય છે, પરંતુ તેની યોગ્ય સંભાળ રાખવી ઘણીવાર મુશ્કેલ બની જાય છે. વાળમાં ગૂંચવણ, ડ્રાયનેસ અને નમીની કમીને કારણે વાળ બેજાન દેખાવા જેવી સમસ્યાઓ વાંકડિયા વાળ ધરાવતા લોકોમાં સામાન્ય જોવા મળે છે. નિષ્ણાતોના મતે, કેટલીક સરળ આદતોમાં ફેરફાર કરીને વાળને નરમ, મજબૂત અને સ્વસ્થ રાખી શકાય છે.

વાંકડિયા વાળને દરરોજ શેમ્પૂ કરવાની જરૂર હોતી નથી. કેટલી વાર વાળ ધોવા જોઈએ તે વ્યક્તિની સ્કેલ્પની સ્થિતિ, તેલ, પરસેવો, ધૂળ અને ડેન્ડ્રફ જેવી સમસ્યાઓ પર આધાર રાખે છે. વધુ પડતું શેમ્પૂ કરવાથી વાળમાં રહેલું કુદરતી તેલ ઘટી શકે છે, જેના કારણે વાળ વધુ સૂકા બની શકે છે.

શેમ્પૂ કરતી વખતે તેને મુખ્યત્વે સ્કેલ્પ પર લગાવીને હળવા હાથે સફાઈ કરવી જોઈએ. વાળની આખી લંબાઈને જોરથી ઘસવાની જરૂર નથી. જો વાળ ધોયા પછી વધુ સૂકા કે ગૂંચવાયેલા લાગે તો હળવું શેમ્પૂ અને યોગ્ય કન્ડિશનર ઉપયોગી સાબિત થઈ શકે છે.

વાંકડિયા વાળ માટે કન્ડિશનર ખાસ મહત્વનું છે. તે વાળની સપાટીને સ્મૂથ બનાવવામાં મદદ કરે છે અને વાળ વચ્ચેનું ઘર્ષણ ઘટાડે છે. જેના કારણે વાળ સળંગ કરવામાં સરળતા રહે છે અને તૂટવાનું જોખમ પણ ઘટી શકે છે.

વાળ સુકવતી વખતે પણ સાવચેતી જરૂરી છે. ટુવાલથી વાળને જોરથી ઘસવાને બદલે હળવેથી પાણી શોષવું જોઈએ. ભીના વાળને ખેંચીને કાંસકો કરવાનું ટાળવું જોઈએ, કારણ કે ખેંચાણ અને ઘર્ષણથી વાળ તૂટવાની શક્યતા વધી શકે છે.

વાળને વધુ નરમ રાખવા માટે હેર સીરમ અથવા લીવ-ઇન કન્ડિશનરનો પણ ઉપયોગ કરી શકાય છે. ખાસ કરીને વાળ ધોયા બાદ હળવા ભીના વાળમાં થોડી માત્રામાં તેનો ઉપયોગ કરવાથી ગૂંચવણ ઓછી થઈ શકે છે. જોકે, વધુ પડતા પ્રોડક્ટનો ઉપયોગ ટાળવો જોઈએ.