ગાંધીનગર ગાંધીનગરમાં મહેસૂલ વિભાગ દ્વારા આયોજિત ગૌરવશાળી સમારોહમાં મુખ્યમંત્રી ભૂપેન્દ્ર પટેલના હસ્તે મહેસૂલ તલાટી તરીકે નવી નિમણૂક મેળવનારા 2,300થી વધુ યુવાઓને નિમણૂક પત્રો એનાયત કરવામાં આવ્યા હતા. આ પ્રસંગે મહેસૂલ વિભાગની વિવિધ ડિજિટલ સેવાઓનું લોન્ચિંગ તેમજ નવી કચેરીઓનું લોકાર્પણ પણ કરવામાં આવ્યું હતું.

'રેવન્યુ તલાટી મહેસૂલ તંત્રની કરોડરજ્જુ છે'

મુખ્યમંત્રી ભૂપેન્દ્ર પટેલે જણાવ્યું હતું કે, રેવન્યુ તલાટી મહેસૂલ તંત્રની કરોડરજ્જુ અને ગ્રામ્ય વહીવટનો આધારસ્તંભ છે. તેમણે નવનિયુક્ત તલાટીઓને ગ્રામજનોના પ્રશ્નો અને સમસ્યાઓનું સ્થાનિક સ્તરે ઝડપી, પારદર્શક અને સંવેદનશીલ રીતે નિરાકરણ લાવવા આહ્વાન કર્યું હતું. તેમણે કહ્યું કે, જરૂરિયાતમંદ વ્યક્તિના કામ સરળતાથી પૂર્ણ કરવાથી મળતા આશીર્વાદ ઈશ્વરના આશીર્વાદ સમાન હોય છે.

લોકોની અપેક્ષાઓ સંતોષાય તેવી કામગીરી પર ભાર

મુખ્યમંત્રીએ કહ્યું કે, મહેસૂલી કામગીરી હંમેશા વ્યવસ્થિત અને નિયમબદ્ધ હોવી જોઈએ જેથી ભવિષ્યમાં વિભાગ કે સરકારને કોઈ મુશ્કેલીનો સામનો કરવો ન પડે. તલાટીએ લોકોની અપેક્ષાઓને સમજીને ઝડપી અને સરળ સેવાઓ આપવી જોઈએ તેમજ પોતાની કામગીરીથી પરિવાર, સમાજ અને રાજ્યને ગૌરવ અપાવવું જોઈએ.

REVA ફીડબેક સિસ્ટમનું લોન્ચિંગ

સમારોહ દરમિયાન મુખ્યમંત્રીના હસ્તે REVA (Revenue Voice and Assistance) નામની ક્યુઆર કોડ આધારિત ફીડબેક સિસ્ટમનું લોન્ચિંગ કરવામાં આવ્યું. આ સિસ્ટમ દ્વારા નાગરિકો કલેક્ટર, મામલતદાર, પ્રાંત, સબ-રજીસ્ટ્રાર અને અન્ય મહેસૂલી કચેરીઓમાં મળતી સેવાઓ તથા કર્મચારીઓના વર્તન અંગે સીધો પ્રતિભાવ આપી શકશે. આ પ્રતિસાદના આધારે સેવાઓમાં વધુ ગુણવત્તાસભર સુધારા કરવામાં આવશે.

IRCMSમાં ઈ-ફાઇલિંગ સુવિધાનો પ્રારંભ

મુખ્યમંત્રીએ ઇન્ટિગ્રેટેડ રેવન્યુ કોર્ટ કેસ મેનેજમેન્ટ સિસ્ટમ (IRCMS) હેઠળ ઈ-ફાઇલિંગ સુવિધાનો પણ પ્રારંભ કરાવ્યો. હવે અરજદારો ઘર બેઠાં જ મહેસૂલી કેસ દાખલ કરી શકશે, કેસની રિયલ-ટાઈમ સ્થિતિ જાણી શકશે તેમજ કેસ પૂર્ણ થયા બાદ ઓનલાઈન આદેશ પણ મેળવી શકશે. આથી સમગ્ર રાજ્યમાં મહેસૂલી કેસોની કામગીરી વધુ ઝડપી અને પારદર્શક બનશે.

સિટી સર્વે નકશાઓ માટે સર્વે ઓફ ઈન્ડિયા સાથે MoU

કાર્યક્રમ દરમિયાન રાજ્ય સરકાર અને સર્વે ઓફ ઈન્ડિયા વચ્ચે સિટી સર્વે નકશાઓના જીઓ-રેફરન્સિંગ માટે સમજૂતી કરાર (MoU) કરવામાં આવ્યો હતો. આ પહેલથી જમીનના નકશાઓ વધુ સચોટ અને આધુનિક બનશે તેમજ જમીન સંબંધિત કામગીરીમાં સરળતા આવશે.

મહેસૂલ રાજ્યમંત્રીએ ભરતી પ્રક્રિયાને ગણાવી ઐતિહાસિક

મહેસૂલ રાજ્યમંત્રી સંજયસિંહ મહીડાએ જણાવ્યું હતું કે, પારદર્શક ભરતી પ્રક્રિયા દ્વારા મોટી સંખ્યામાં ખાલી જગ્યાઓ ભરાતા હવે ગામડાં સુધી મહેસૂલી સેવાઓ વધુ અસરકારક રીતે પહોંચશે. તેમણે નવનિયુક્ત તલાટીઓને સામાન્ય નાગરિકો, ખેડૂતો અને જરૂરિયાતમંદ લોકો સાથે સંવેદનશીલ વર્તન રાખીને જવાબદારીપૂર્વક સેવા આપવા અપીલ કરી હતી.

મુખ્ય સચિવે જવાબદારીપૂર્વક ફરજ બજાવવા આપ્યો સંદેશ

મુખ્ય સચિવ એમ.કે. દાસે જણાવ્યું હતું કે, તમામ ઉમેદવારોની પસંદગી માત્ર મેરિટ અને મહેનતના આધારે થઈ છે. તેમણે તલાટીઓને જમીનના રેકોર્ડ સચોટ રાખવા, સરકારી જમીનો પરના દબાણો અટકાવવા અને વિકાસ કાર્યોમાં જવાબદારીપૂર્વક કામગીરી કરવાની સલાહ આપી હતી.

2,389 જગ્યાઓની ભરતી પ્રક્રિયા પૂર્ણ

મહેસૂલ વિભાગના અધિક મુખ્ય સચિવ ડૉ. જયંતી રવિએ જણાવ્યું હતું કે, રાજ્યમાં 2,389 મહેસૂલ તલાટીઓની ભરતી પ્રક્રિયા સફળતાપૂર્વક પૂર્ણ થઈ છે. મુખ્યમંત્રીના માર્ગદર્શન હેઠળ તલાટીઓ માટે જોબ ચાર્ટ પણ તૈયાર કરવામાં આવ્યો છે, જેના આધારે ગામડાંના નાગરિકોને વધુ સારી અને સમયસર સેવાઓ મળી શકશે.

મોટી સંખ્યામાં મહાનુભાવો રહ્યા ઉપસ્થિત

આ કાર્યક્રમમાં ગાંધીનગરના મેયર મીરાબેન પટેલ, જિલ્લા પંચાયત પ્રમુખ રાજેશભાઈ પટેલ, ધારાસભ્ય રીટાબેન પટેલ, અધિક મુખ્ય સચિવ ડૉ. અંજુ શર્મા, ગુજરાત ગૌણ સેવા પસંદગી મંડળના અધ્યક્ષ તુષાર ધોળકિયા સહિત મહેસૂલ વિભાગના વરિષ્ઠ અધિકારીઓ અને મોટી સંખ્યામાં નવનિયુક્ત મહેસૂલી તલાટીઓ ઉપસ્થિત રહ્યા હતા. રાજ્યના તમામ જિલ્લાઓમાંથી અધિકારીઓ અને નવનિયુક્ત તલાટીઓ વર્ચ્યુઅલ માધ્યમથી પણ કાર્યક્રમમાં જોડાયા હતા.