Rajkot Construction Site Theft: રાજકોટ શહેરમાં છેલ્લા કેટલાક સમયથી અંડર કન્સ્ટ્રક્શન બિલ્ડિંગો અને વિવિધ પ્રોજેક્ટ સાઇટો પરથી કીમતી સામાનની ચોરીની ઘટનાઓમાં વધારો નોંધાઈ રહ્યો હતો. ખાસ કરીને સેન્ટિંગ કામમાં ઉપયોગમાં લેવાતી મોંઘી એલ્યુમિનિયમ પ્લેટોની ચોરીથી બિલ્ડરો અને ડેવલપરોમાં ચિંતા વ્યાપી હતી. આ મામલાને ગંભીરતાથી લઈને રાજકોટ પોલીસ કમિશનરના માર્ગદર્શન હેઠળ ક્રાઇમ બ્રાન્ચ અને સ્થાનિક પોલીસ દ્વારા વિશેષ તપાસ હાથ ધરવામાં આવી હતી. પોલીસે સીસીટીવી ફૂટેજ, ટેકનિકલ સર્વેલન્સ અને હ્યુમન સોર્સિસની મદદથી શંકાસ્પદ હિલચાલ પર સતત નજર રાખી હતી. તપાસ દરમિયાન એક સુનિયોજિત ગેંગની સંડોવણી સામે આવી હતી.

દિવસ દરમિયાન રેકી, રાત્રે ચોરી
પોલીસ તપાસમાં ખુલાસો થયો છે કે આરોપીઓ દિવસ દરમિયાન મજૂર અથવા અન્ય વ્યક્તિ તરીકે બાંધકામ સાઇટોની મુલાકાત લઈ રેકી કરતા હતા. કઈ સાઇટ પર સુરક્ષા ઓછી છે અને ક્યાં કિંમતી સામાન પડ્યો છે તેની માહિતી એકત્રિત કર્યા બાદ રાત્રિના સમયે ચોરીને અંજામ આપતા હતા. આરોપીઓ સિક્યોરિટી ગાર્ડની નજર ચૂકવી અથવા સાઇટના પાછળના ભાગેથી અંદર પ્રવેશી એલ્યુમિનિયમ પ્લેટો ભેગી કરતા હતા. ત્યારબાદ તેઓ પોતાના પિકઅપ વાહન અથવા લોડિંગ ટેમ્પોમાં માલ ભરીને સ્થળ પરથી ફરાર થઈ જતા હતા.

વાહન ચેકિંગ દરમિયાન ઝડપાયા
પોલીસને મળેલી ચોક્કસ બાતમીના આધારે વાહન ચેકિંગ દરમિયાન શંકાસ્પદ વાહનને અટકાવવામાં આવ્યું હતું. તપાસ દરમિયાન વાહનમાંથી ચોરીની એલ્યુમિનિયમ પ્લેટો મળી આવતા પોલીસે 6 આરોપીઓને ઝડપી પાડ્યા હતા. કડક પૂછપરછ દરમિયાન આરોપીઓએ રાજકોટની ચાર અલગ-અલગ બાંધકામ સાઇટો પરથી ચોરી કરી હોવાની કબૂલાત કરી હતી.

18 લાખનો મુદ્દામાલ કબજે
પોલીસે આરોપીઓ પાસેથી ચોરીની એલ્યુમિનિયમ પ્લેટો, ગુનામાં વપરાયેલા વાહનો અને અન્ય સામગ્રી સહિત કુલ 18 લાખ રૂપિયાનો મુદ્દામાલ કબજે કર્યો છે. હાલમાં પોલીસે આ ગેંગના અન્ય સાગરિતો તેમજ ચોરીનો માલ ખરીદનારા ભંગાર વેપારીઓ સુધી પહોંચવા તપાસનો દોર આગળ વધાર્યો છે. પોલીસ એ પણ તપાસ કરી રહી છે કે આરોપીઓએ રાજકોટ સિવાય અન્ય શહેરોમાં પણ આવી ચોરીઓને અંજામ આપ્યો છે કે નહીં.