જામનગર: અબોલ જીવો પ્રત્યે થતી ક્રૂરતા અટકાવવા અને પ્રાણી કલ્યાણને વધુ મજબૂત બનાવવા માટે જામનગર જિલ્લા વહીવટી તંત્રે મહત્વપૂર્ણ નિર્ણય લીધો છે. જિલ્લા કલેક્ટર પી.બી. પંડ્યાની અધ્યક્ષતામાં યોજાયેલી જિલ્લા પ્રાણી ક્રૂરતા નિવારણ સોસાયટીની કારોબારી બેઠકમાં ‘ગ્લૂ ટ્રેપ’ના ઉત્પાદન, સંગ્રહ, વેચાણ અને ઉપયોગ પર સંપૂર્ણ પ્રતિબંધ અમલમાં મૂકવાનો નિર્ણય લેવામાં આવ્યો છે.

હાઈકોર્ટના આદેશનું કડક પાલન
બેઠક દરમિયાન ગુજરાત હાઈકોર્ટના નિર્દેશોને ધ્યાનમાં રાખીને ગ્લૂ ટ્રેપ સામે કડક વલણ અપનાવવામાં આવ્યું હતું. ઉંદર અને અન્ય જીવજંતુઓને પકડવા માટે વપરાતી ગ્લૂ ટ્રેપ પ્રાણીઓ માટે અત્યંત પીડાદાયક અને ક્રૂર ગણાતી હોવાથી તેના ઉપયોગને સંપૂર્ણપણે પ્રતિબંધિત કરવામાં આવ્યો છે. કલેક્ટર પી.બી. પંડ્યાએ સ્પષ્ટ શબ્દોમાં જણાવ્યું હતું કે ગ્લૂ ટ્રેપના ઉત્પાદન, વેચાણ કે ઉપયોગ સાથે સંકળાયેલા કોઈપણ વ્યક્તિ સામે કાયદેસરની કાર્યવાહી કરવામાં આવશે.

પ્રાણી ક્રૂરતા અંગે તાત્કાલિક કાર્યવાહીનો આદેશ
બેઠકમાં જિલ્લામાં પ્રાણી ક્રૂરતાના બનાવોને ગંભીરતાથી લેવા અને આવી ફરિયાદો મળતા જ તાત્કાલિક કાર્યવાહી કરવા માટે વહીવટી તંત્ર અને સંબંધિત વિભાગોને સૂચના આપવામાં આવી હતી. કલેક્ટરે જણાવ્યું કે અબોલ જીવોની સુરક્ષા અને કલ્યાણ માટે તમામ વિભાગોએ સંકલન સાથે કામગીરી કરવી જરૂરી છે.

અધિકારીઓ અને સંસ્થાઓએ રજૂ કર્યા સૂચનો
આ બેઠકમાં જિલ્લા વિકાસ અધિકારી સુશ્રી નિશા, પશુપાલન વિભાગના અધિકારીઓ, સમિતિના સરકારી તેમજ બિનસરકારી સભ્યો અને પ્રાણી કલ્યાણ ક્ષેત્રે કાર્યરત વિવિધ સંસ્થાઓના પ્રતિનિધિઓ ઉપસ્થિત રહ્યા હતા. પ્રાણી કલ્યાણને વધુ અસરકારક બનાવવા માટે વિવિધ સૂચનો અને ભલામણો પણ રજૂ કરવામાં આવી હતી. જામનગર જિલ્લામાં પ્રાણી હિત માટે લેવામાં આવેલો આ નિર્ણય પ્રાણી ક્રૂરતા અટકાવવા અને અબોલ જીવોના રક્ષણ માટે મહત્વપૂર્ણ પગલું માનવામાં આવી રહ્યું છે.