Farmers Compensation for Power Lines:  ગુજરાત સરકાર દ્વારા ખેડૂતો માટે બે મહત્વપૂર્ણ નિર્ણયો જાહેર કરવામાં આવ્યા છે. એક તરફ વાવેતરની સિઝન દરમિયાન ખેડૂતોને ડીઝલની અછત ન સર્જાય તે માટે પેટ્રોલ પંપ પરથી 200 લીટર સુધી ડીઝલ મેળવવાની છૂટ આપવામાં આવી છે, તો બીજી તરફ ખેતરોમાંથી પસાર થતી વીજ લાઈન અને વીજ થાંભલાઓ માટે આપવામાં આવતા વળતરમાં નોંધપાત્ર વધારો કરવાનો નિર્ણય લેવામાં આવ્યો છે. રાજ્ય સરકારના પ્રવક્તા અને મંત્રી જીતુ વાઘાણીએ પ્રેસ કોન્ફરન્સમાં જણાવ્યું હતું કે ખેડૂતોની લાંબા સમયથી ચાલતી માંગણીઓ અને રજૂઆતોને ધ્યાને રાખીને આ નિર્ણય લેવામાં આવ્યો છે. ખાસ કરીને મોરબી જિલ્લાના જેતપુર ખાતે છેલ્લા 16 દિવસથી ચાલી રહેલા ખેડૂત આંદોલન બાદ સરકારે ખેડૂતોના હિતમાં મહત્વપૂર્ણ જાહેરાત કરી છે.

હવે જંત્રી નહીં, બજાર ભાવના આધારે મળશે વળતર
અત્યાર સુધી ખેડૂતોના ખેતરમાંથી પસાર થતી વીજ લાઈન અથવા વીજ થાંભલા માટે જંત્રીના આધારે વળતર ચૂકવવામાં આવતું હતું. પરંતુ હવે રાજ્ય સરકારે આ નિયમમાં મોટો ફેરફાર કર્યો છે. હવે ખેડૂતોને જમીનની વાસ્તવિક બજાર કિંમતના આધારે બમણું વળતર આપવામાં આવશે. સરકારે જમીનની બજાર કિંમત નક્કી કરવા માટે માર્કેટ રેટ કમિટી (MRC) બનાવવાનો નિર્ણય કર્યો છે. આ કમિટીમાં કલેક્ટર, અસરગ્રસ્ત ખેડૂતોના પ્રતિનિધિઓ, કંપનીના પ્રતિનિધિઓ અને રજિસ્ટર્ડ વેલ્યુઅરોનો સમાવેશ કરવામાં આવશે.

ખેડૂતોને મળશે વધારાનો લાભ
મંત્રી જીતુ વાઘાણીએ જણાવ્યું કે હવે વીજ થાંભલાના પાયાની આસપાસ વધારાના એક મીટર વિસ્તારને પણ વળતરની ગણતરીમાં સામેલ કરવામાં આવશે. અગાઉ 40-40-20ના હપ્તા પ્રમાણે વળતર ચૂકવવામાં આવતું હતું, પરંતુ હવે ખેડૂતોને એક જ હપ્તામાં સંપૂર્ણ વળતર અગાઉથી ચૂકવવામાં આવશે. સરકારે સ્પષ્ટ કર્યું છે કે વળતર ચૂકવ્યા બાદ જ ખેડૂતોના ખેતરમાં વીજ પોલ અથવા ટ્રાન્સમિશન લાઈનનું કામ શરૂ કરવામાં આવશે.

જેતપુરના ખેડૂતોને મળશે ત્રણ ગણાથી વધુ વળતર
સરકારના જણાવ્યા મુજબ, મોરબીના જેતપુર ગામના ખેડૂતોને જૂની પદ્ધતિ મુજબ અંદાજે 12.74 લાખ રૂપિયા મળવાના હતા. પરંતુ નવી વળતર નીતિ અમલમાં આવ્યા બાદ હવે એ જ ખેડૂતોને આશરે 37.25 લાખ રૂપિયા સુધીનું વળતર મળશે. આ ઉપરાંત સુરેન્દ્રનગર જિલ્લાના કોંઢ ગામના ખેડૂતોને પણ આ નવી નીતિનો સીધો લાભ મળશે.

ખેડૂતો માટે ડીઝલ અંગે પણ મોટી જાહેરાત
વાવેતરની સિઝનને ધ્યાનમાં રાખીને સરકારે ખેડૂતોને પેટ્રોલ પંપ પરથી 200 લીટર સુધી ડીઝલ ખરીદવાની મંજૂરી આપી છે. ખેડૂતો ટ્રેક્ટર, પંપસેટ અને અન્ય કૃષિ સાધનો માટે બેરલ કે અન્ય પાત્રોમાં પણ ડીઝલ લઈ શકશે. જીતુ વાઘાણીએ જણાવ્યું કે રાજ્યમાં ઇંધણનો પૂરતો જથ્થો ઉપલબ્ધ છે અને ખેડૂતોને કોઈ મુશ્કેલી ન પડે તે માટે મુખ્યમંત્રી ભૂપેન્દ્ર પટેલ સતત પરિસ્થિતિની સમીક્ષા કરી રહ્યા છે.

ખેડૂતોના હિતને પ્રાથમિકતા
સરકારે ભારપૂર્વક જણાવ્યું છે કે રાજ્યમાં ખેડૂતોનું હિત સર્વોપરી છે. વીજ લાઈન માટેનું વધારેલું વળતર અને ડીઝલ ઉપલબ્ધ કરાવવાનો નિર્ણય ખેતી અને વાવેતરની પ્રક્રિયાને વધુ સરળ બનાવશે અને ખેડૂતોની આર્થિક ચિંતાઓમાં ઘટાડો કરશે.

ખેડૂતો માટે સરકારની મોટી જાહેરાત

• જમીનની બજાર કિંમત નક્કી કરવા MRC કમિટી બનાવાશે: વાઘાણી
• ખેતરમાંથી વીજપોલ નીકળતો હોય તો વળતરમાં વધારો
• રજૂઆતને ધ્યાને રાખી ખેડૂતો રાજી થાય તે રીતે નિર્ણય કર્યો: વાઘાણી
• જંત્રી નહીં પણ બજાર ભાવના આધારે વળતર મળશેઃ વાઘાણી
• વીજ થાંભલો લાગે તો વધારાની એક મીટરની જમીનનું વળતર ચૂકવાશે
• હવે તબક્કાવાર નહીં પણ અગાઉ જ વળતર ચૂકવાશે: વાઘાણી
• ખેડૂતોને એક જ હપ્તામાં અગાઉથી તમામ વળતર ચૂકવાશે: વાઘાણી
• વળતર માટે સમિતિની રચના કરવામાં આવશે: વાઘાણી
• વીજ થાંભલો લાગે તો વધારાની એક મીટરની જમીનનું વળતર ચૂકવાશે
• ખેતરમાંથી વીજપોલ નીકળતો હોય તો વળતરમાં વધારો
• જેતપરના ખેડૂતોને જુની ગણતરી પ્રમાણે 12.74 લાખ રૂપિયા મળવા પાત્ર હતા
• કોંઢ સુરેન્દ્રનગરના ગામના ખેડૂતો માટે નિર્ણય
• નવી ગણતરી પ્રમાણે જેતપુરની ખેડૂતોને હવે 37.25 લાખ રૂપિયા જેટલું વળતર મળશે
• જેતપુરના ખેડૂતોને જુની ગણતરી પ્રમાણે 12.74 લાખ રૂપિયા મળવા પાત્ર હતા