અમદાવાદ: ગુજરાત સરકાર દ્વારા અમદાવાદ શહેરના નવા પોલીસ કમિશનર તરીકે IPS અધિકારી અનુપમસિંહ ગેહલોતની નિમણૂક કરવામાં આવી છે. રાજ્યના પોલીસ વડા (DGP) તરીકે જી.એસ. મલિકની નિમણૂક થયા બાદ અમદાવાદ પોલીસ કમિશનરનું પદ ખાલી પડ્યું હતું. હવે રાજ્ય સરકારે શહેરની કાયદો-વ્યવસ્થા અને સુરક્ષા વ્યવસ્થાને ધ્યાનમાં રાખીને અનુભવી અધિકારી અનુપમસિંહ ગેહલોતને આ મહત્વપૂર્ણ જવાબદારી સોંપી છે. અમદાવાદ રાજ્યનું સૌથી મોટું મહાનગર હોવાને કારણે અહીં કાયદો-વ્યવસ્થા જાળવવી, ટ્રાફિક મેનેજમેન્ટ, સાયબર ક્રાઇમ, સંગઠિત ગુનાખોરી અને મોટા જાહેર કાર્યક્રમોની સુરક્ષા જેવા અનેક પડકારો હોય છે. આવા સમયે લાંબા વહીવટી અનુભવ ધરાવતા અધિકારીની નિમણૂકને મહત્વપૂર્ણ માનવામાં આવી રહી છે.

1997 બેચના અનુભવી IPS અધિકારી
IPS અધિકારી અનુપમસિંહ ગેહલોત 1997ની બેચના અધિકારી છે. તેઓ ભાવનગરમાં જિલ્લા પોલીસ વડા તરીકે ફરજ પર રહ્યા પછી તેમની બદલી પાટણ કરવામાં આવી હતી. ત્યાર બાદ તેમની વડોદરાના રેન્જ આઈજી તરીકે બદલી કરાઈ હતી. વડોદરા બાદ તેમને રાજકોટના પોલીસ કમિશનર તરીકે નિમવામાં આવ્યા હતાં. તેઓ વડોદરાના પણ પોલીસ કમિશનર રહ્યા હતાં. તેમની આઈબીમાં પણ ટ્રાન્સફર કરવામાં આવી હતી. આઈબીમાંથી તેમને ફરીવાર વડોદરાના કમિશનર તરીકે નિયુક્ત કરાયા હતાં. વડોદરા બાદ રાજ્ય સરકારે તેમને સુરતના પોલીસ કમિશનર તરીકે નિમ્યા હતાં. અમદાવાદના નવા પોલીસ કમિશનર બનેલા અનુપમસિંહ ગેહલોત મુળ ઉત્તર પ્રદેશના વતની છે. તેમણે B.E અને M.TECHનો અભ્યાસ કર્યો છે. 

સુરતમાં નોંધપાત્ર કામગીરી
અમદાવાદમાં નિમણૂક પહેલાં અનુપમસિંહ ગેહલોત સુરત શહેરના પોલીસ કમિશનર તરીકે કાર્યરત હતા. સુરતમાં તેમના કાર્યકાળ દરમિયાન કાયદો-વ્યવસ્થા જાળવવા, ટ્રાફિક મેનેજમેન્ટ મજબૂત બનાવવા અને વિવિધ પ્રકારના ગુનાઓ પર નિયંત્રણ માટે અનેક પગલાં લેવામાં આવ્યા હતા. તેમની શિસ્તબદ્ધ કાર્યશૈલી અને ઝડપી નિર્ણય લેવાની ક્ષમતાના કારણે તેઓ પોલીસ તંત્રમાં એક સક્ષમ અધિકારી તરીકે ઓળખાય છે.

રથયાત્રા પહેલા મહત્વની નિમણૂક
અમદાવાદમાં આગામી દિવસોમાં યોજાનારી ભગવાન જગન્નાથજીની ઐતિહાસિક રથયાત્રાને ધ્યાનમાં રાખીને પણ આ નિમણૂકને મહત્વપૂર્ણ માનવામાં આવી રહી છે. દર વર્ષે લાખો શ્રદ્ધાળુઓ રથયાત્રામાં જોડાતા હોવાથી શહેરમાં વિશાળ સુરક્ષા બંદોબસ્ત ગોઠવવામાં આવે છે. સૂત્રોના જણાવ્યા મુજબ રથયાત્રા, તહેવારોની સિઝન અને અન્ય મોટા જાહેર કાર્યક્રમોને ધ્યાનમાં રાખીને સરકાર દ્વારા ટૂંકા ગાળામાં આ નિર્ણય લેવામાં આવ્યો છે. ગેહલોત અગાઉ પણ મોટા શહેરોમાં પોલીસ કમિશનર તરીકે સફળતાપૂર્વક ફરજ બજાવી ચૂક્યા હોવાથી તેમની પસંદગી કરવામાં આવી હોવાનું માનવામાં આવે છે.

ભાવનગરથી શરૂ થઈને અમદાવાદ સુધીની શાનદાર સફર
1997 બેચના ગુજરાત કેડરના આઈપીએસ અધિકારી અનુપમસિંહ ગેહલોતનો અત્યાર સુધીનો ટ્રેક રેકોર્ડ ખૂબ જ શાનદાર રહ્યો છે:

• તેમણે સૌપ્રથમ ભાવનગર અને ત્યારબાદ પાટણ જિલ્લામાં પોલીસ વડા (SP) તરીકે કડક કામગીરી કરી હતી.
• વહીવટી કુશળતાને આધારે પ્રમોશન મેળવી તેઓ વડોદરાના રેન્જ આઈજી બન્યા હતા.
• ત્યારબાદ સરકારે તેમને રાજકોટના પોલીસ કમિશનર જેવી મોટી જવાબદારી સોંપી હતી.
• તેઓ ઇન્ટેલિજન્સ બ્યુરો (IB) માં પણ મહત્વની સેવાઓ આપી ચૂક્યા છે.
• આઈબી (IB) ના કાર્યકાળ બાદ રાજ્ય સરકારે તેમને ફરી એકવાર વડોદરાના કમિશનર અને ત્યારબાદ સુરતના પોલીસ કમિશનર તરીકે નિયુક્ત કર્યા હતા.
   
• અનુપમ સિંહ ગેહલોત 1997 બેચના ગુજરાત કેડરના IPS અધિકારી
• વર્ષ 2013માં ઉત્કૃષ્ટ સેવાઓ બદલ Police Medal for Meritorious Serviceથી સન્માનિત
• 14 એપ્રિલ 2024થી સુરત માં પોલીસ કમિશ્નર તરીકે ફરજ બજાવી રહ્યા છે
• કાયદો-વ્યવસ્થા અને ગુનાઓ સામેની કડક કામગીરી માટે જાણીતા અધિકારી

સરકાર દ્વારા બહાર પાડવામાં આવેલી નોટિફિકેશન મુજબ, અમદાવાદ શહેરના પોલીસ કમિશનરની એક્સ-કેડર પોસ્ટને એડિશનલ ડિરેક્ટર જનરલ ઓફ પોલીસ (ADGP) ગ્રેડમાંથી ડાઉનગ્રેડ કરીને ઇન્સ્પેક્ટર જનરલ ઓફ પોલીસ (IGP) ગ્રેડમાં લાવવામાં આવી છે. ત્યારબાદ આ ખાલી પડેલી જગ્યા પર ગેહલોતની નિમણૂક કરાઈ છે. રાજ્યપાલના નામે ગૃહ વિભાગના મુખ્ય સચિવ સંજીવ કુમાર અને સંયુક્ત સચિવ કે. કે. પટેલે આ સત્તાવાર આદેશ જારી કર્યો છે. હવે અનુપમસિંહ ગેહલોત રાજ્યના આ આર્થિક પાટનગર ગણાતા અમદાવાદની કાયદો અને વ્યવસ્થાની કમાન સંભાળશે. જોકે, સુરતના નવા પોલીસ કમિશનર કોણ બનશે તેની જાહેરાત હજુ બાકી છે.

અમદાવાદ માટે શું રહેશે પડકાર?
નવા પોલીસ કમિશનર તરીકે અનુપમસિંહ ગેહલોત સામે શહેરમાં વધતા સાયબર ક્રાઇમ, ટ્રાફિક સમસ્યાઓ, સંગઠિત ગુનાખોરી પર નિયંત્રણ, મહિલા સુરક્ષા અને મોટા જાહેર કાર્યક્રમોની સુરક્ષા સુનિશ્ચિત કરવા જેવા મહત્વપૂર્ણ પડકારો રહેશે. જોકે તેમના અગાઉના અનુભવને જોતા પોલીસ વિભાગ અને શહેરવાસીઓમાં નવી અપેક્ષાઓ જાગી છે.