આણંદ: આણંદ જિલ્લામાં ખેડૂતોને સસ્તા ભાવે ખાતર આપી છેતરપિંડી આચરતા એક મોટા કૌભાંડનો પર્દાફાશ થયો છે. આણંદ એસઓજી (SOG) પોલીસે બાતમીના આધારે આણંદ તાલુકાના વડોદ ગામ પાસે દરોડો પાડીને નકલી ખાતર બનાવવાનું કારખાનું ઝડપી પાડ્યું છે. આ મામલે પોલીસે એક શખ્સની ધરપકડ કરી છે અને લાખો રૂપિયાનો મુદ્દામાલ જપ્ત કર્યો છે.

દરોડામાં ભેળસેળયુક્ત ખાતરનો ખુલાસો
SOG પોલીસને બાતમી મળી હતી કે વડોદ ગામની સીમમાં નકલી ખાતર બનાવવામાં આવી રહ્યું છે. પોલીસે દરોડો પાડતા ત્યાંથી મોટા પ્રમાણમાં શંકાસ્પદ ખાતરનો જથ્થો મળી આવ્યો હતો. આ અંગે તુરંત જ આણંદ કૃષિ વિભાગને જાણ કરવામાં આવી હતી. કૃષિ વિભાગના અધિકારીઓએ સ્થળ પર પહોંચી ખાતરના નમૂના લઈ પરીક્ષણ કર્યું હતું, જેમાં ચોંકાવનારો ખુલાસો થયો કે આ ખાતર સંપૂર્ણપણે બનાવટી અને ભેળસેળયુક્ત છે.

18 લાખથી વધુનો મુદ્દામાલ જપ્ત
પોલીસ કાર્યવાહી દરમિયાન સ્થળ પરથી નકલી ખાતરની કુલ 3454 બેગો મળી આવી હતી, જે પોલીસે જપ્ત કરી છે. આ ઉપરાંત ખાતરની હેરફેર માટે વપરાતી ટ્રક અને ખાતર બનાવવા માટેની મશીનરી સહિત કુલ ₹18 લાખથી વધુની કિંમતનો મુદ્દામાલ કબજે કરવામાં આવ્યો છે. આ ટોળકી ખેડૂતોને લલચાવવા માટે બજાર કરતા સસ્તા ભાવે આ નકલી ખાતર વેચી રહી હતી.

એકની ધરપકડ, મુખ્ય સૂત્રધારની શોધખોળ
આ મામલે પોલીસે સ્થળ પરથી ભાવનગરના રઘુવીર મનસુખભાઈ સોલંકી નામના શખ્સની ધરપકડ કરી છે. આણંદના ડીવાયએસપી (DySP) જે.એન. સોલંકીએ જણાવ્યું હતું કે, આ કૌભાંડમાં સંડોવાયેલા મુખ્ય આરોપી અને અન્ય શખ્સોની શોધખોળ માટે ચક્રો ગતિમાન કરવામાં આવ્યા છે. પોલીસ હવે એ દિશામાં તપાસ કરી રહી છે કે આ નકલી ખાતર અત્યાર સુધી કયા કયા વિસ્તારોમાં સપ્લાય કરવામાં આવ્યું છે.