Ahmedabad Metro DGP Travel:  અમદાવાદમાં રાજ્યના ઇન્ચાર્જ ડીજીપીએ મેટ્રોમાં મુસાફરી કરીને લોકોને જાહેર પરિવહનનો વધુ ઉપયોગ કરવા પ્રેરિત કર્યા છે. ઇન્ચાર્જ ડીજીપી પોતાના નિવાસસ્થાનથી રાણીપ મેટ્રો સ્ટેશન પહોંચ્યા બાદ મેટ્રો મારફતે ગાંધીનગર પોલીસ ભવન સુધી પહોંચ્યા હતા. આ દરમિયાન તેમણે મેટ્રો સેવા અને સુરક્ષા વ્યવસ્થાની પણ સમીક્ષા કરી હતી.

કોટેશ્વર મેટ્રો સ્ટેશન પર સુરક્ષા વ્યવસ્થાની સમીક્ષા
મુસાફરી દરમિયાન ઇન્ચાર્જ ડીજીપીએ કોટેશ્વર મેટ્રો સ્ટેશનની મુલાકાત લઈને ત્યાંની સુરક્ષા વ્યવસ્થાનું નિરીક્ષણ કર્યું હતું. પોલીસ અને સુરક્ષા એજન્સીઓ દ્વારા મુસાફરોની સુરક્ષા માટે કરવામાં આવેલી વ્યવસ્થાઓ અંગે માહિતી મેળવી અને જરૂરી સૂચનો આપ્યા હતા.

ઇંધણ બચાવવા જાહેર પરિવહનનો ઉપયોગ કરવાની અપીલ
પ્રવર્તમાન પરિસ્થિતિમાં વધતા ઇંધણ ખર્ચ અને વૈશ્વિક પરિસ્થિતિને ધ્યાનમાં રાખીને ઇન્ચાર્જ ડીજીપીએ લોકોને વધુમાં વધુ જાહેર પરિવહનનો ઉપયોગ કરવાની અપીલ કરી હતી. તેમણે જણાવ્યું કે મેટ્રો જેવી સુવિધાઓનો ઉપયોગ કરવાથી ટ્રાફિકનું દબાણ ઘટશે તેમજ ઇંધણની પણ બચત થશે.

PM મોદીની અપીલ બાદ વધ્યું જાહેર પરિવહન પ્રત્યે ધ્યાન
વડાપ્રધાન નરેન્દ્ર મોદીએ તાજેતરમાં દેશના નાગરિકોને ઇંધણ બચાવવા અને જાહેર પરિવહન અપનાવવા અપીલ કરી હતી. ત્યારબાદ રાજ્યના ઇન્ચાર્જ ડીજીપી દ્વારા મેટ્રોમાં મુસાફરી કરવી એક મહત્વપૂર્ણ સંદેશ તરીકે જોવામાં આવી રહી છે. આ પગલાથી લોકોમાં પણ જાહેર પરિવહન પ્રત્યે જાગૃતિ વધે તેવી શક્યતા વ્યક્ત કરવામાં આવી રહી છે.