અમદાવાદ: રાજધાની ગાંધીનગર તરફ કૂચ કરવાના હેતુથી અમદાવાદના ઓગણજ ખાતે એકત્રિત થયેલા પ્રદર્શનકારીઓ અને આયોજકો વચ્ચે મોટો વિવાદ સામે આવ્યો છે. વિરોધ પક્ષ કોંગ્રેસના સમર્થનથી શરૂ થયેલી આ 'ટ્રેક્ટર યાત્રા' પ્રથમ દિવસથી જ વિવાદોમાં ઘેરાઈ ગઈ છે. પ્રાપ્ત વિગતો અનુસાર, આંદોલનના સ્થળે જ કોંગ્રેસના નેતાઓ અને સ્થાનિક ખેડૂત પ્રતિનિધિઓ વચ્ચે ઉગ્ર બોલાચાલી અને ઘર્ષણના દ્રશ્યો જોવા મળ્યા હતા. જમીની સ્તરે ખેડૂતોએ આ આયોજનને રાજકીય પ્રેરિત ગણાવીને વિરોધ કર્યો હોવાના અહેવાલો છે.

મોટા દાવા પોકળ સાબિત થયા: સંખ્યાબળ ખૂટ્યું
આંદોલનની શરૂઆત પહેલાં સંગઠનો દ્વારા એવો દાવો કરવામાં આવ્યો હતો કે આશરે ૧૫૦૦ જેટલા ટ્રેક્ટરો અને હજારોની મેદની સાથે ખેડૂતો રસ્તા પર ઉતરશે. જોકે, વાસ્તવિક સ્થિતિ તેનાથી તદ્દન વિપરીત જોવા મળી હતી. વિરોધ પ્રદર્શનના સ્થળે આ અપેક્ષિત સંખ્યાબળ એકઠું થઈ શક્યું ન હતું. ગણતરીના લોકો અને વાહનો જ હાજર રહેતા રાજકીય પક્ષો દ્વારા આંદોલનનો ગ્રાફ મોટો કરવાનો આખો દાવ ઊંધો પડ્યો હોવાની ચર્ચા ચાલી રહી છે.

ખેડૂતોએ જ લગાવ્યા આક્ષેપ: "અમારો મોહરા તરીકે ઉપયોગ થયો"
સૂત્રો પાસેથી મળતી માહિતી મુજબ, ઓગણજ ખાતે એકત્રિત થયેલા અસલી ખેડૂતોને જ્યારે અહેસાસ થયો કે આ પ્રદર્શન પાછળ ખેડૂતોના હિત કરતાં રાજકીય એજન્ડા વધુ સક્રિય છે, ત્યારે આંતરિક ડખો શરૂ થયો હતો. સ્થાનિક ખેડૂત આગેવાનોએ ખુલ્લેઆમ આક્ષેપ કર્યો છે કે સામાન્ય અને ભોળા ખેડૂતોને ભ્રમિત કરીને તેમનો મોહરા તરીકે ઉપયોગ કરવામાં આવી રહ્યો છે. આ આંતરિક ખેંચતાણને કારણે જ અનેક ખેડૂતો અને તેમના સંગઠનો આ આંદોલનથી અધવચ્ચે જ અળગા થઈ ગયા હતા.

ટ્રાફિક જામ: મુસાફરો અને નોકરિયાતો અટવાયા
બીજી તરફ, આ ફ્લોપ સાબિત થયેલા આંદોલન અને ચક્કાજામના પ્રયાસોને કારણે સામાન્ય નાગરિકોએ ભારે કિંમત ચૂકવવી પડી છે. અમદાવાદના એસ.પી. રિંગ રોડ અને આસપાસના વિસ્તારોમાં કલાકો સુધી વાહનોની લાંબી કતારો જોવા મળી હતી. હોસ્પિટલ જતા દર્દીઓ, ઓફિસે જતા કર્મચારીઓ અને સ્કૂલ-કોલેજના વિદ્યાર્થીઓ રસ્તા પર અટવાઈ પડ્યા હતા. જનતાએ પણ વહીવટીતંત્ર અને પ્રદર્શનકારીઓ સામે સોશિયલ મીડિયા પર આક્રોશ ઠાલવ્યો છે. વાસ્તવિક ખેડૂતોના અસહકાર અને જનતાના આક્રોશને કારણે કોંગ્રેસ પ્રેરિત આ વિરોધ પ્રદર્શન સદંતર નિષ્ફળ રહ્યું હોવાનું ચિત્ર સ્પષ્ટ થઈ રહ્યું છે.