ગાંધીનગર ગુજરાત રાજ્ય માર્ગ પરિવહન નિગમ (GSRTC)ના કર્મચારીઓ માટે રાજ્ય સરકારે મહત્વનો નિર્ણય લીધો છે. મુખ્યમંત્રી ભૂપેન્દ્ર પટેલના માર્ગદર્શન હેઠળ એસટી નિગમના કર્મચારીઓના હિતમાં મોંઘવારી ભથ્થા (DA)માં 3 ટકાનો વધારો કરવાનો નિર્ણય લેવામાં આવ્યો છે. આ વધારા બાદ હવે કર્મચારીઓને 58 ટકા મોંઘવારી ભથ્થું ચૂકવવામાં આવશે.

DAમાં 3 ટકાનો વધારો

અત્યાર સુધી એસટી નિગમના કર્મચારીઓને 55 ટકા મોંઘવારી ભથ્થું મળતું હતું. રાજ્ય સરકારના નવા નિર્ણય બાદ તેમાં 3 ટકાનો વધારો કરવામાં આવ્યો છે, જેથી હવે કર્મચારીઓને 58 ટકા DAનો લાભ મળશે.

એરિયર્સની રકમ પણ ચૂકવાશે

સરકારે સ્પષ્ટ કર્યું છે કે વધારાયેલા મોંઘવારી ભથ્થાની એરિયર્સ (બાકી રકમ) પણ કર્મચારીઓને ચૂકવવામાં આવશે. આ નિર્ણયથી કર્મચારીઓને આર્થિક રીતે વધુ રાહત મળશે.

₹24 કરોડથી વધુનો થશે લાભ

આ નિર્ણયથી ગુજરાત એસટી નિગમના કર્મચારીઓને કુલ મળીને ₹24 કરોડથી વધુનો સીધો આર્થિક લાભ મળશે. રાજ્ય સરકાર ટૂંક સમયમાં આ અંગેનો વિગતવાર શાસકીય આદેશ જાહેર કરશે.