ગાંધીનગર: ગાંધીનગરના સ્વપ્રકાશ સોસાયટી વિસ્તારમાં રહેતા 28 વર્ષીય પોલીસ કર્મચારી પર્વ વિનોદભારતી ગોસ્વામીએ પોતાના નિવાસસ્થાને ગળેફાંસો ખાઈ આત્મહત્યા કરી લીધી હોવાની ઘટના સામે આવી છે. ઘટનાને પગલે પરિવારજનો તેમજ પોલીસ વિભાગમાં શોકની લાગણી પ્રસરી ગઈ છે.

પ્રાપ્ત માહિતી અનુસાર, પર્વ ગોસ્વામી પોલીસ વિભાગમાં ફરજ બજાવતા હતા. શનિવારે રાત્રે તેમણે પોતાના ઘરે ગળેફાંસો ખાઈ જીવન ટૂંકાવ્યું હતું. ઘટનાની જાણ થતાં પોલીસ તાત્કાલિક સ્થળ પર પહોંચી હતી અને મૃતદેહને નીચે ઉતારી પોસ્ટમોર્ટમ માટે હોસ્પિટલ ખસેડવામાં આવ્યો હતો.

પરિવારના જણાવ્યા અનુસાર, ઘટના સમયે તેમની પત્ની અને પુત્ર કોઈ કામસર ઘરની બહાર ગયા હતા. ઘરે પરત ફર્યા બાદ પત્નીને પર્વ ગોસ્વામી ગળેફાંસો ખાધેલી હાલતમાં જોવા મળ્યા હતા. આ દૃશ્ય જોઈ પરિવારજનો પર આભ તૂટી પડ્યું હતું.

ઘટનાની જાણ થતાં સંબંધિત પોલીસ સ્ટેશનના અધિકારીઓ પણ સ્થળ પર પહોંચ્યા હતા અને જરૂરી કાર્યવાહી હાથ ધરી હતી. હાલમાં પોલીસે આત્મહત્યાનું ચોક્કસ કારણ જાણવા તપાસ શરૂ કરી છે.

પ્રાથમિક તબક્કે આત્મહત્યાનું કારણ સ્પષ્ટ થયું નથી. પોલીસ પરિવારજનોના નિવેદનો સહિત વિવિધ પાસાઓને ધ્યાનમાં રાખી વધુ તપાસ કરી રહી છે. પોસ્ટમોર્ટમ રિપોર્ટ અને તપાસ પૂર્ણ થયા બાદ જ સમગ્ર ઘટનાક્રમ અંગે વધુ વિગતો સામે આવશે.