2026 French Open: ફ્રેન્ચ ઓપન 2026માં ઇટાલિયન ટેનિસનો દબદબો જોવા મળી રહ્યો છે. વર્લ્ડ નંબર-1 જૅનિક સિન્નર અને લોરેન્ઝો મુસેટ્ટી ટૂર્નામેન્ટમાંથી બહાર થઈ ગયા હોવા છતાં ઇટાલીના બે ખેલાડીઓએ પુરુષ સિંગલ્સની સેમિફાઈનલમાં સ્થાન મેળવીને ઈતિહાસ રચ્યો છે.

ફ્લાવિયો કોબોલી અને માટેઓ અર્નાલ્ડીએ પોતાના ક્વાર્ટર ફાઈનલ મુકાબલા જીત્યા બાદ અંતિમ-4માં પ્રવેશ કર્યો છે. હવે શુક્રવારે બંને ખેલાડીઓ વચ્ચે સેમિફાઈનલ રમાશે. ગ્રાન્ડ સ્લેમના ઈતિહાસમાં આ પ્રથમ વખત બનશે કે પુરુષ સિંગલ્સની સેમિફાઈનલમાં બે ઇટાલિયન ખેલાડીઓ આમને-સામને હશે.

ઇટાલિયન ટેનિસ માટે ગૌરવની ક્ષણ:

સેમિફાઈનલમાં પહોંચ્યા બાદ ફ્લાવિયો કોબોલીએ જણાવ્યું હતું કે, "ઇટાલિયન ટેનિસ માટે આ ખૂબ જ ગૌરવ અને ખુશીની વાત છે." ગયા વર્ષે જૅનિક સિન્નર અને લોરેન્ઝો મુસેટ્ટી પણ અંતિમ ચાર સુધી પહોંચ્યા હતા, પરંતુ બંને ડ્રોના અલગ-અલગ ભાગમાં હોવાથી તેમની વચ્ચે મુકાબલો થયો ન હતો.

કોબોલીની શાનદાર જીત:

24 વર્ષીય ફ્લાવિયો કોબોલીએ કેનેડાના ફેલિક્સ ઓગર-અલિયાસિમેને 4-6, 6-4, 6-4, 6-4થી હરાવી સેમિફાઈનલમાં સ્થાન મેળવ્યું હતું. પ્રથમ સેટ ગુમાવ્યા બાદ કોબોલીએ જબરદસ્ત વાપસી કરી અને સતત ત્રણ સેટ જીતી મેચ પોતાના નામે કરી.

અર્નાલ્ડીને ઈજાના કારણે મળ્યું સેમિફાઈનલનું ટિકિટ

બીજી તરફ માટેઓ અર્નાલ્ડીને તેમના જ દેશના ખેલાડી માટેઓ બેરેટિની સામે રમવાનું હતું. પરંતુ બેરેટિની ડાબા હિપની ઈજાથી પરેશાન હતા અને બીજા સેટ દરમિયાન પાછળ રહી જતાં મેચમાંથી નિવૃત્ત થઈ ગયા. જેના કારણે અર્નાલ્ડીને સીધું સેમિફાઈનલનું ટિકિટ મળી ગયું.

જ્વેરેવ અને મેન્સિક વચ્ચે બીજી સેમિફાઈનલ

પુરુષ સિંગલ્સની બીજી સેમિફાઈનલમાં જર્મનીના એલેક્ઝાન્ડર જ્વેરેવ અને ચેક રિપબ્લિકના જેકબ મેન્સિક આમને-સામને થશે.

જ્વેરેવે સ્પેનના રાફેલ જોડારને 7-6, 6-1, 6-3થી હરાવ્યો હતો, જ્યારે મેન્સિકે બ્રાઝિલના જોઆઓ ફોન્સેકાને 6-4, 6-3, 7-6થી પરાજય આપ્યો હતો. ફોન્સેકાએ અગાઉ ટૂર્નામેન્ટમાં નોવાક જોકોવિચને બહારનો રસ્તો બતાવ્યો હતો.

ડબલ્સમાં પણ ઇટાલીનો દબદબો

ફ્રેન્ચ ઓપનમાં માત્ર સિંગલ્સ જ નહીં, ડબલ્સ સ્પર્ધાઓમાં પણ ઇટાલિયન ખેલાડીઓનો દબદબો જોવા મળી રહ્યો છે. સારા એરાની અને આન્દ્રેઆ વાવાસોરી ગુરુવારે મિક્સ્ડ ડબલ્સની ફાઈનલ રમશે. જ્યારે આન્દ્રેઆ વાવાસોરી અને સિમોને બોલેલીની જોડી પુરુષ ડબલ્સની સેમિફાઈનલમાં પહોંચી ચૂકી છે.

ઇટાલિયન ખેલાડીઓના આ પ્રદર્શનથી દેશના ટેનિસ ઈતિહાસમાં એક નવો સુવર્ણ અધ્યાય ઉમેરાયો છે.