Europe Against Iran: ગલ્ફ દેશોની મુલાકાત દરમિયાન યુરોપિયન કાઉન્સિલના પ્રમુખ એન્ટોનિયો કોસ્ટાએ ઈરાન સામે કડક વલણ અપનાવ્યું છે અને કહ્યું કે, યુરોપ યુએઈ, સાઉદી અરેબિયા અને કતાર જેવા તેના ભાગીદાર દેશો સાથે ઉભું છે. 

કોસ્ટાએ ઈરાનના હુમલાઓને અંધાધૂંધ, અન્યાયી અને ગેરકાયદેસર ગણાવ્યા છે અને કહ્યું કે, આવા સમયમાં યુરોપ તેના સાથી દેશો સાથે મજબૂતીથી ઉભું રહેશે. તેમણે એમ પણ કહ્યું કે, પ્રદેશમાં શાંતિ અને સ્થિરતા જાળવવા માટે સંવાદ અને રાજદ્વારી જરૂરી છે.

તેમણે એમ પણ કહ્યું કે, યુરોપ ગલ્ફ દેશો માટે એક વિશ્વસનીય ભાગીદાર છે અને મધ્ય પૂર્વમાં કાયમી શાંતિ માટે તમામ શક્ય સમર્થન પૂરું પાડવા તૈયાર છે. આ દરમિયાન યુરોપિયન કમિશનના પ્રમુખ ઉર્સુલા વોન ડેર લેયેને હોર્મુઝ સ્ટ્રેટને શક્ય તેટલી વહેલી તકે ફરીથી ખોલવાની હાકલ કરી હતી અને કહ્યું હતું કે, હોર્મુઝ સ્ટ્રેટ બંધ થવાથી વૈશ્વિક વેપાર અને તેલ પુરવઠા પર ગંભીર અસર પડી રહી છે. તેમણે ચેતવણી આપી હતી કે, જો હોર્મુઝમાં નેવિગેશનની સ્વતંત્રતા પુનઃસ્થાપિત કરવામાં નહીં આવે, તો સમગ્ર વિશ્વને આર્થિક અને લોજિસ્ટિકલ પરિણામોનો સામનો કરવો પડશે.

અમેરિકાના રાષ્ટ્રપતિ ડોનાલ્ડ ટ્રમ્પે હોર્મુઝ સ્ટ્રેટમાં શિપિંગ પર નૌકાદળના નાકાબંધીની જાહેરાત કરતા પરિસ્થિતિ વધુ વણસી ગઈ છે. અમેરિકા-ઈરાન વાટાઘાટો નિષ્ફળ ગયા બાદ આ નિર્ણય લેવામાં આવ્યો હતો. એકંદરે, મધ્ય પૂર્વ કટોકટી હવે એક વૈશ્વિક મુદ્દો બની ગઈ છે, જેમાં અમેરિકા, ઈરાન, યુરોપ અને ખાડી દેશો આમને-સામને છે.