Donald Trump on Tariffs: અમેરિકન રાષ્ટ્રપતિ ટ્રમ્પના એક નિવેદનથી ભારતીય શેરબજારના ફાર્માસ્યુટિકલ ક્ષેત્રમાં ખળભળાટ મચી ગયો છે. ટ્રમ્પે સંકેત આપ્યો છે કે અમેરિકામાં આવતી બ્રાન્ડેડ અને પેટન્ટ દવાઓ પર 100% સુધીનો ટેરિફ લાદવામાં આવી શકે છે. આ સમાચાર બહાર આવતાની સાથે જ રોકાણકારો ગભરાઈ ગયા અને ઘણી ફાર્માસ્યુટિકલ કંપનીઓના શેરમાં તીવ્ર ઘટાડો નોંધાયો છે. 

સન ફાર્માસ્યુટિકલ ઇન્ડસ્ટ્રીઝ સૌથી વધુ પ્રભાવિત થઈ છે. જેના શેર લગભગ 4-5% ઘટ્યા અને 52 અઠવાડિયાના નીચલા સ્તરે પહોંચી ગયા છે. આ દરમિયાન, Divi's Laboratories, Biocon, Lupin, Dr. Redddy's Laboratories, Cipla અને Zydus Lifesciences જેવા મોટા નામોમાં પણ 2થી 4%નો ઘટાડો જોવા મળ્યો. નિફ્ટી ફાર્મા ઇન્ડેક્સમાં પણ લગભગ 2.5%નો ઘટાડો જોવા મળ્યો છે.

બ્લૂમબર્ગના એક અહેવાલ મુજબ, ટ્રમ્પ કહે છે કે, જો વિદેશી દવા કંપનીઓ અમેરિકામાં ઉત્પાદન નહીં કરે, તો તેમની દવાઓ પર ભારે કર લાદવામાં આવશે. તેમનું ધ્યાન ‘મેડ ઇન અમેરિકા’ને પ્રોત્સાહન આપવા અને સ્થાનિક રોજગાર વધારવા પર છે. આ જ કારણ છે કે, ટ્રમ્પ આવા ટેરિફ લાદવાની તૈયારી કરી રહ્યા છે. જો કે, નિષ્ણાતો માને છે કે બજારમાં હાલનો ઘટાડો ભાવનાત્મક રીતે વધુ છે. ભારતથી અમેરિકામાં મોકલવામાં આવતી મોટાભાગની દવાઓ જેનરિક દવાઓ છે. આ સસ્તી દવાઓ છે અને અત્યાર સુધી ટેરિફ બ્રાન્ડેડ અને પેટન્ટ દવાઓ પર કેન્દ્રિત છે. તેથી, બધી કંપનીઓ પર સીધી મોટી અસર થવાની શક્યતા ઓછી માનવામાં આવે છે.

કઈ ફાર્મા કંપનીઓ સૌથી વધુ પ્રભાવિત છે?
તેમ છતાં, કેટલીક કંપનીઓ વધુ પ્રભાવિત દેખાઈ રહી છે. ઉદાહરણ તરીકે, સન ફાર્મા યુએસમાં કેટલીક વિશેષ અને બ્રાન્ડેડ દવાઓ પણ વેચે છે. પરિણામે, તેના શેર દબાણ હેઠળ આવ્યા છે. આ દરમિયાન ડીવી'સ લેબોરેટરીઝ અને લૌરસ લેબ્સ જેવી કંપનીઓ, જે યુએસ અને યુરોપમાં નિકાસ કરવામાં આવતા API (સક્રિય ફાર્માસ્યુટિકલ ઘટકો)નું ઉત્પાદન કરે છે, તેમાં પણ થોડી નબળાઈ જોવા મળી.

જેનેરિક દવાઓનો હિસ્સો 90%થી વધુ
જો કે, એક સકારાત્મક પાસું એ છે કે, ઘણી ભારતીય કંપનીઓ પહેલાથી જ અમેરિકામાં રોકાણ કરી રહી છે. બાયોકોને તાજેતરમાં ન્યુ જર્સીમાં પોતાનું યુનિટ ખોલ્યું છે. તેથી, સ્થાનિક હાજરી ધરાવતી કંપનીઓ પર ટેરિફની અસર મર્યાદિત હોઈ શકે છે. ભારત દર વર્ષે અમેરિકામાં આશરે $10.5 બિલિયન મૂલ્યની દવાઓની નિકાસ કરે છે, જેમાંથી 90%થી વધુ જેનેરિક દવાઓ છે. બજાર નિષ્ણાતો કહે છે કે, રોકાણકારોએ હાલમાં ગભરાવાની જરૂર નથી. આ ઘટાડો ટૂંકાગાળાનો હોઈ શકે છે. જો કંપનીઓ અમેરિકામાં તેમની હાજરીનો વિસ્તાર કરે અને તેમની વ્યૂહરચનાઓ સમાયોજિત કરે, તો તેમને ભવિષ્યમાં ફાયદો થઈ શકે છે.

ટ્રમ્પનું નિવેદન બજાર માટે ચોક્કસપણે ફટકો છે, પરંતુ ભારતીય ફાર્માસ્યુટિકલ ક્ષેત્રની મૂળભૂત તાકાત અકબંધ છે. ટેરિફ નીતિ કેટલી હદ સુધી લાગુ કરવામાં આવે છે અને કંપનીઓ તેને કેવી રીતે અનુકૂલન કરે છે તે જોવું મહત્વપૂર્ણ રહેશે.