Smartphone Airplane Mode: આજના સમયમાં સ્માર્ટફોન આપણા જીવનનો અભિન્ન ભાગ બની ગયો છે. જોકે, ફોનમાંથી નીકળતા રેડિએશન અંગે લોકોમાં અનેક પ્રશ્નો અને ગેરસમજો જોવા મળે છે. સૌથી સામાન્ય પ્રશ્ન એ છે કે Airplane Mode ચાલુ કરવાથી શું સ્માર્ટફોનનું રેડિએશન સંપૂર્ણપણે બંધ થઈ જાય છે?

સ્માર્ટફોન કોલ, મેસેજ અને ઇન્ટરનેટ માટે Radio Frequency (RF) Signals નો ઉપયોગ કરે છે. જ્યારે ફોન મોબાઇલ ટાવર, Wi-Fi અથવા Bluetooth સાથે જોડાયેલો હોય છે ત્યારે તે ઇલેક્ટ્રોમેગ્નેટિક રેડિએશન ઉત્સર્જિત કરે છે. જોકે વૈજ્ઞાનિકોનું કહેવું છે કે આ રેડિએશન Non-Ionizing Radiation શ્રેણીમાં આવે છે, જે X-Ray અથવા Gamma Rays જેટલું શક્તિશાળી નથી.

જ્યારે તમે ફોનમાં Airplane Mode ચાલુ કરો છો ત્યારે મોબાઇલ નેટવર્ક, કોલિંગ, SMS અને મોબાઇલ ડેટા સહિત મોટાભાગના વાયરલેસ કનેક્શન બંધ થઈ જાય છે. પરિણામે ફોન મોબાઇલ ટાવર સાથે સંપર્ક કરવાનો પ્રયાસ કરતો નથી અને RF રેડિએશનનું ઉત્સર્જન ખૂબ જ ઘટી જાય છે.

પરંતુ શું રેડિએશન સંપૂર્ણપણે બંધ થઈ જાય છે? જવાબ છે ના જો Airplane Mode ચાલુ કર્યા પછી તમે Wi-Fi અથવા Bluetooth ફરીથી ચાલુ કરો છો, તો ફોન ફરીથી વાયરલેસ સિગ્નલ મોકલવા લાગે છે અને થોડું રેડિએશન ઉત્સર્જિત થાય છે. જો તમામ વાયરલેસ કનેક્શન બંધ રાખવામાં આવે તો RF રેડિએશન લગભગ શૂન્યની નજીક પહોંચી જાય છે.

ઘણા લોકો રાત્રે સૂતી વખતે Airplane Modeનો ઉપયોગ કરે છે. તેનાથી અનાવશ્યક કોલ અને નોટિફિકેશન્સથી બચી શકાય છે, સાથે જ ફોન સતત નેટવર્ક શોધતો ન હોવાથી બેટરીની બચત પણ થાય છે.

નિષ્ણાતોના જણાવ્યા અનુસાર, Airplane Mode રેડિએશન ઘટાડવામાં મદદરૂપ છે, પરંતુ સ્માર્ટફોનના સામાન્ય ઉપયોગથી થતી રેડિએશનને લઈને અત્યાર સુધીના વૈજ્ઞાનિક પુરાવાઓ મુજબ સામાન્ય વપરાશથી ગંભીર આરોગ્ય જોખમ સાબિત થયા નથી. તેમ છતાં, જરૂરિયાત મુજબ Airplane Modeનો ઉપયોગ કરવાથી બેટરી અને ધ્યાન બંને બચાવી શકાય છે.