WhatsAppની વધશે ટેન્શન! Telegram લાવી રહ્યું એવું ફીચર કે 1 ક્લિકમાં મળશે પોતાની વેબસાઇટ, જાણો શું છે .gram ડોમેન યોજના?

Telegram Domain: મેસેજિંગ પ્લેટફોર્મ Telegram હવે માત્ર ચેટિંગ, ગ્રુપ અને ચેનલ સુધી સીમિત રહેવાને બદલે ડિજિટલ પબ્લિશિંગ અને વેબસાઇટ પ્લેટફોર્મ તરીકે પણ આગળ વધવાની તૈયારી કરી રહ્યું છે. Telegramના ફાઉન્ડર અને CEO પાવેલ દુરોવે કંપનીની નવી યોજનાની માહિતી આપતા જણાવ્યું છે કે Telegramએ .gram ટોપ-લેવલ ડોમેન માટે અરજી કરી છે. જો આ ડોમેનને મંજૂરી મળે છે, તો Telegramના યુઝર્સ માટે પોતાના યુઝરનેમ સાથે જોડાયેલું વ્યક્તિગત વેબ એડ્રેસ મેળવવાનો રસ્તો ખુલશે. આ સાથે કંપની AI આધારિત એવું ફીચર પણ લાવવાની તૈયારીમાં છે, જેના દ્વારા યુઝર્સ માત્ર એક સરળ પ્રોમ્પ્ટ આપીને પોતાની વેબસાઇટ તૈયાર કરી શકશે.

યુઝરનેમ બની શકે છે વેબસાઇટનું એડ્રેસ
હાલ Telegram પર દરેક યુઝર પાસે પોતાનું યુઝરનેમ હોય છે. નવા .gram ડોમેનની યોજના અમલમાં આવે તો આ યુઝરનેમ ભવિષ્યમાં વેબસાઇટના એડ્રેસ તરીકે ઉપયોગમાં લઈ શકાય છે. ઉદાહરણ તરીકે, કોઈ યુઝરનું Telegram યુઝરનેમ Anil હોય તો તેની સંભવિત વેબસાઇટ anil.gram જેવી હોઈ શકે છે. આ સુવિધા Telegramને પરંપરાગત મેસેજિંગ એપથી આગળ લઈ જઈને વ્યક્તિગત ડિજિટલ પ્રેઝન્સ માટેનું પ્લેટફોર્મ બનાવી શકે છે.

AIની મદદથી બનાવશે આખી વેબસાઇટ
Telegramની સૌથી રસપ્રદ યોજના તેના AI ફીચરને લઈને છે. આ ફીચરની મદદથી યુઝર્સને વેબસાઇટ બનાવવા માટે કોડિંગ અથવા વેબ ડેવલપમેન્ટનું જ્ઞાન હોવું જરૂરી નહીં રહે. યુઝર્સ પોતાની જરૂરિયાત સરળ ભાષામાં લખીને અથવા પ્રોમ્પ્ટ દ્વારા જણાવશે અને AI તેના આધારે સંપૂર્ણ ઇન્ટરેક્ટિવ વેબસાઇટ તૈયાર કરવામાં મદદ કરશે. અર્થાત, વેબસાઇટ બનાવવા માટે અલગથી ડેવલપર શોધવાની કે ટેક્નિકલ કોડિંગ શીખવાની જરૂરિયાત ઘણી હદ સુધી ઘટી શકે છે.

હોસ્ટિંગ અને સિક્યોરિટી પણ Telegram સંભાળશે?
આ યોજના હેઠળ Telegram પોતાના પ્લેટફોર્મ સાથે વેબસાઇટ હોસ્ટિંગ અને સુરક્ષા જેવી બાબતોને પણ જોડવાની દિશામાં આગળ વધી શકે છે. એટલે યુઝર્સને વેબસાઇટ બનાવ્યા બાદ અલગ-અલગ ટેક્નિકલ સેવાઓ માટે અન્ય પ્લેટફોર્મ પર આધાર રાખવાની જરૂરિયાત ઓછી થઈ શકે છે. આ પ્રકારનું ઈન્ટિગ્રેટેડ ઈકોસિસ્ટમ Telegramને મેસેજિંગ એપમાંથી એક મોટા ડિજિટલ પ્લેટફોર્મમાં પરિવર્તિત કરી શકે છે.

WhatsApp માટે પણ બની શકે છે પડકાર
Telegramની આ યોજના સફળતાપૂર્વક અમલમાં આવે તો મેસેજિંગ ક્ષેત્રમાં સ્પર્ધા વધુ રસપ્રદ બની શકે છે. ખાસ કરીને AIની મદદથી વેબસાઇટ બનાવવાની સુવિધા Telegramના યુઝર્સને ચેટિંગ ઉપરાંત ડિજિટલ કન્ટેન્ટ અને પર્સનલ બ્રાન્ડિંગ માટે પણ નવી તક આપી શકે છે. જોકે, .gram ડોમેનની મંજૂરી અને આ તમામ સુવિધાઓના અંતિમ અમલ અંગે હજુ વધુ સત્તાવાર વિગતોની રાહ જોવી પડશે.

Telegram બની શકે છે ‘મેસેજિંગથી આગળ’નું પ્લેટફોર્મ
Telegramની આ નવી પહેલથી સ્પષ્ટ થાય છે કે કંપની માત્ર મેસેજિંગ એપ તરીકે નહીં પરંતુ યુઝર્સને એક જ પ્લેટફોર્મ પર ચેટિંગ, કન્ટેન્ટ, AI અને વેબ પ્રેઝન્સ જેવી સુવિધાઓ આપવાની દિશામાં આગળ વધી રહી છે. જો .gram ડોમેન અને AI વેબસાઇટ બિલ્ડર ફીચર વાસ્તવિક રૂપમાં ઉપલબ્ધ થાય છે, તો સામાન્ય યુઝર માટે પોતાની વેબસાઇટ બનાવવી પહેલા કરતાં ઘણી સરળ બની શકે છે.