Dhurandhar 2: ધુરંધર 2 બોક્સ ઓફિસ પર ધૂમ મચાવી રહી છે. સાત દિવસમાં ફિલ્મનું કલેક્શન ₹1000 કરોડને વટાવી ગયું છે. જનતા, વિવેચકો, દિગ્દર્શકો અને કલાકારો બધા જ ફિલ્મના વખાણ કરી રહ્યા છે. ધુરંધર 2ની સફળતા વચ્ચે યામી ગૌતમ ફિલ્મ જોવા માટે થિયેટરમાં ગઈ, પરંતુ તેની બહેને પોલ ખોલી નાંખી હતી.

યામી ગૌતમની બહેન સુરીલી ગૌતમે ગુરુવારે સોશિયલ મીડિયા એકાઉન્ટ પર એક વીડિયો શેર કર્યો છે. યામીએ આ વીડિયો ફરીથી શેર કર્યો છે. વીડિયોમાં યામી થિયેટરમાં ધુરંધર 2 જોતી જોવા મળે છે. સિનેમા હોલ લોકોથી ભરેલો દેખાય છે. ધુરંધર 2માં તેની એન્ટ્રી જોઈને યામી વીડિયોમાં શરમાઈને ચહેરો છુપાવતી દેખાય છે. યામી તેના હોઠ પર આંગળી રાખીને સુરીલીને ચૂપ રહેવાનો સંકેત આપે છે, જેથી થિયેટરમાં લોકો તેને ઓળખી ન શકે.

સુરીલીએ વીડિયો શેર કરતી વખતે એક ભાવનાત્મક પોસ્ટ લખી હતી.  તેણે લખ્યું કે, ‘ફરી એકવાર @adityadharfilmsને સલામ. બીજી એક માસ્ટરપીસ!! એક શાનદાર ફિલ્મ અને અમને તમારા પર ખૂબ ગર્વ છે. અમે તમારી સફળતાની ઉજવણી કરી રહ્યા છીએ અને મારી સુંદર બહેન, જે તમારી શક્તિ અને નસીબનો સૌથી મોટો સ્ત્રોત છે, @yamigautam. તમને બધાને ખૂબ પ્રેમ છે અને હવે ચાલો પાર્ટી કરીએ.’

૧૯ માર્ચે રિલીઝ થયેલી ધુરંધર-2એ વિશ્વભરમાં 1000 કરોડ રૂપિયાનો આંકડો પાર કરી લીધો છે અને આ આંકડો સતત વધી રહ્યો છે. યામી ગૌતમ અને આદિત્ય ધરના સંબંધોની વાત કરીએ તો, તેમની પ્રેમકથા ઉરી ફિલ્મના સેટ પર શરૂ થઈ હતી. બંને શાંત અને સરળ જીવનમાં માનતા હતા. યામી અને આદિત્યનો આ અનોખો ગુણ તેમને નજીક લાવ્યો હતો. યામી અને આદિત્યએ 2021માં ખૂબ ધામધૂમ વિના લગ્ન કર્યા હતા. તેમના લગ્નના ત્રણ વર્ષ પછી આ દંપતીએ મે 2024માં તેમના પુત્ર, વેદવિદનું સ્વાગત કર્યું હતું. યામી અને આદિત્ય તેમના કામ અને ઘરના જીવનને ખૂબ સારી રીતે સંભાળી રહ્યા છે.