અમદાવાદ: જુલાઈ મહિનાના પ્રથમ જ દિવસે વેપારીઓ અને હોટલ-રેસ્ટોરન્ટ વ્યવસાય સાથે જોડાયેલા લોકો માટે રાહતના સમાચાર આવ્યા છે. 19 કિલોગ્રામના કોમર્શિયલ LPG ગેસ સિલિન્ડરની કિંમતમાં ₹183.50નો ઘટાડો કરવામાં આવ્યો છે. નવા દર આજથી અમલમાં આવ્યા છે.

નવી કિંમત મુજબ, અગાઉ ₹3,113માં મળતો 19 કિલોગ્રામનો કોમર્શિયલ LPG સિલિન્ડર હવે ₹2,930માં ઉપલબ્ધ થશે. ભાવમાં થયેલા આ ઘટાડાથી હોટલ, રેસ્ટોરન્ટ, કેટરિંગ અને અન્ય કોમર્શિયલ ગેસનો ઉપયોગ કરતા વ્યવસાયોને સીધો લાભ મળશે.

જોકે, 14.2 કિલોગ્રામના ઘરેલુ LPG સિલિન્ડરની કિંમતોમાં હાલ કોઈ ફેરફાર કરવામાં આવ્યો નથી. ઓઈલ માર્કેટિંગ કંપનીઓ દ્વારા જાહેર કરાયેલા નવા દરો આજથી દેશભરમાં લાગુ થઈ ગયા છે.

વ્યાપાર ક્ષેત્રના જાણકારોનું માનવું છે કે કોમર્શિયલ ગેસના ભાવમાં થયેલા ઘટાડાથી નાના અને મધ્યમ ઉદ્યોગો તેમજ ફૂડ બિઝનેસના સંચાલન ખર્ચમાં રાહત મળશે.