China Warning America: હોર્મુઝ સ્ટ્રેટ પર વધી રહેલા તણાવ વચ્ચે ચીને અમેરિકાને કડક સંદેશ આપ્યો છે. ચીનના સંરક્ષણ પ્રધાન ડોંગ જુને સ્પષ્ટપણે કહ્યું છે કે, તેમનો દેશ તેના હિતોમાં કોઈપણ બાહ્ય હસ્તક્ષેપ સ્વીકારશે નહીં અને ઈરાન સાથેના વેપાર અને ઉર્જા કરારોનું સન્માન કરવાનું ચાલુ રાખશે.

આ નિવેદન એવા સમયે આવ્યું છે, જ્યારે યુએસ રાષ્ટ્રપતિ ડોનાલ્ડ ટ્રમ્પે ઈરાની બંદરોની નાકાબંધીનો આદેશ આપ્યો છે. આ પગલાંથી પ્રદેશમાં તણાવ વધુ વધ્યો છે અને ઘણા દેશોના જહાજોની અવરજવર પર અસર પડી છે.

ચીને સ્પષ્ટતા કરી હતી કે, હોર્મુઝ સ્ટ્રેટમાં ઈરાનનો પ્રભાવ છે અને આ જળમાર્ગ ચીન માટે ખુલ્લો રહેવો જોઈએ. ડોંગ જુને કહ્યું હતું કે, ચીની જહાજો આ માર્ગ પરથી સતત પસાર થઈ રહ્યા છે અને ચીન કોઈપણ સંજોગોમાં તેના ઉર્જા કરારો ચાલુ રાખશે. તેમણે એમ પણ કહ્યું હતું કે, ચીનને આશા છે કે અન્ય દેશો તેની બાબતોમાં દખલ નહીં કરે. આ નિવેદનને અમેરિકાને સીધી ચેતવણી તરીકે જોવામાં આવી રહ્યું છે. 

આ દરમિયાન ઘણા દેશોએ અમેરિકાના નાકાબંધી પર નારાજગી વ્યક્ત કરી છે. સ્પેનિશ સંરક્ષણ પ્રધાન માર્ગારીતા રોબલ્સે તેને અર્થહીન ગણાવ્યું હતું, જ્યારે ઓસ્ટ્રેલિયાના વડાપ્રધાન એન્થોની અલ્બેનીસએ કહ્યું હતું કે, જળમાર્ગ બધા દેશો માટે ખુલ્લો રહેવો જોઈએ અને તેમને નાકાબંધીમાં જોડાવા માટે કોઈ વિનંતી મળી નથી. તણાવની અસર વૈશ્વિક તેલ બજાર પર પણ પડી છે.

બ્રેન્ટ ક્રૂડનો ભાવ પ્રતિ બેરલ $101થી ઉપર ગયો છે, જ્યારે યુએસ ક્રૂડ પણ પ્રતિ બેરલ $104 સુધી પહોંચી ગયો છે. નિષ્ણાતો કહે છે કે, જો હોર્મુઝમાં તણાવ ચાલુ રહેશે તો ઊર્જા બજારમાં અસ્થિરતા ચાલુ રહેશે. બીજી તરફ, ઈરાને પણ કડક વલણ અપનાવ્યું છે અને પર્સિયન ગલ્ફ અને ઓમાનના અખાતમાં બંદરોને નિશાન બનાવવાની ધમકી આપી છે. તેનાથી યુદ્ધવિરામ તૂટી શકે છે અને સંઘર્ષ ફરી શરૂ થઈ શકે છે તેવો ભય વધી ગયો છે. મેરીટાઇમ સિક્યુરિટી એજન્સી યુનાઇટેડ કિંગડમ મેરીટાઇમ ટ્રેડ ઓપરેશન્સે જહાજોને ચેતવણી આપી છે કે, આ વિસ્તારમાં લશ્કરી પ્રવૃત્તિઓ વધી શકે છે અને તેમણે સતર્ક રહેવું જોઈએ. એકંદરે હોર્મુઝ હવે વૈશ્વિક તણાવનું કેન્દ્ર બની ગયું છે, જ્યાં અમેરિકા, ચીન અને ઈરાન વચ્ચે સંઘર્ષનું જોખમ સતત વધી રહ્યું છે.