છોટાઉદેપુર: જિલ્લાના તેજગઢ-ઝોઝ માર્ગ પર આવેલા રેલવે ગરનાળાના સાઇડમાં લગાવવામાં આવેલી લોખંડી એંગલ તૂટી જતાં પુલના એક ભાગને નુકસાન પહોંચ્યું હોવાનું સામે આવ્યું છે. ઘટનાના કારણે માર્ગ પરથી પસાર થતા વાહનચાલકો અને રોજિંદા મુસાફરોમાં ચિંતા ફેલાઈ છે, જ્યારે અકસ્માતનો ભય પણ ઊભો થયો છે.

સ્થાનિકોના જણાવ્યા મુજબ છેલ્લા કેટલાક સમયથી આ માર્ગ પર ભારે વાહનોની અવરજવર સતત વધી રહી છે. ખાસ કરીને રેતી ભરેલા ટ્રકો અને અન્ય ભારે વાહનોના વધતા દબાણના કારણે ગરનાળાની સ્થિતિ નબળી બની હોવાનું માનવામાં આવી રહ્યું છે. હવે સાઇડની લોખંડી એંગલ તૂટી જતાં પુલની સુરક્ષા સામે પણ સવાલો ઊભા થયા છે.

ગ્રામજનોએ આક્ષેપ કર્યો છે કે વિસ્તારમાં ચાલી રહેલા રેતી ખનન અને ભારે વાહનોની બેફામ અવરજવરથી જાહેર માર્ગો અને પુલોને સતત નુકસાન પહોંચી રહ્યું છે. જેના કારણે સામાન્ય નાગરિકો અને મુસાફરોને મુશ્કેલીઓનો સામનો કરવો પડી રહ્યો છે.

ઘટનાને પગલે સ્થાનિક લોકોએ તંત્ર સમક્ષ તાત્કાલિક સમારકામ કરવાની માંગ કરી છે. સાથે જ પુલની સુરક્ષા સુનિશ્ચિત કરવા અને ભારે વાહનોની અવરજવર પર નિયંત્રણ લાવવા જરૂરી પગલાં ભરવા પણ અપીલ કરી છે, જેથી ભવિષ્યમાં કોઈ અનિચ્છનીય અકસ્માત સર્જાય નહીં.