લંડન: મહિલા ટી20 વર્લ્ડ કપ 2026ની ફાઇનલમાં ઓસ્ટ્રેલિયાએ ઇંગ્લેન્ડને 7 વિકેટે હરાવી ઇતિહાસ રચ્યો છે. આ જીત સાથે ઓસ્ટ્રેલિયાએ મહિલા ટી20 વર્લ્ડ કપનો રેકોર્ડ સાતમો ખિતાબ જીત્યો છે. ટીમની જીતમાં ઓપનર બેથ મૂનીએ 49 બોલમાં 64 રનની મેચવિનિંગ ઇનિંગ્સ રમી હતી, જેના માટે તેમને 'પ્લેયર ઓફ ધ મેચ' જાહેર કરવામાં આવ્યા હતા. ઉપરાંત સમગ્ર ટૂર્નામેન્ટમાં સતત શ્રેષ્ઠ પ્રદર્શન બદલ તેમને 'પ્લેયર ઓફ ધ ટૂર્નામેન્ટ'નો ખિતાબ પણ એનાયત થયો હતો.

જીત બાદ બેથ મૂનીએ કહ્યું કે, "આ સિદ્ધિથી હું ખૂબ ખુશ છું. છેલ્લા બે ICC ટૂર્નામેન્ટ અમારા માટે સારા રહ્યા નહોતા. આજે સવારે ઉઠતાં જ મને લાગ્યું કે ફાઇનલ સુધી પહોંચવું પણ અમારા માટે મોટી સિદ્ધિ છે અને તેના માટે અમે આભારી છીએ."

બેટિંગ ઉપરાંત મૂનીએ વિકેટકીપિંગમાં પણ મહત્વનું યોગદાન આપ્યું હતું. તેમણે ઇંગ્લેન્ડની ઓપનર ડેની વાઈટ-હોજને સ્ટમ્પ આઉટ કરી મહત્વની સફળતા અપાવી હતી. મૂનીએ જણાવ્યું કે શરૂઆતમાં તેઓ વિકેટકીપિંગમાં સંપૂર્ણ આત્મવિશ્વાસમાં નહોતા, પરંતુ ઓસ્ટ્રેલિયન કોચિંગ સ્ટાફે સતત પ્રોત્સાહન આપતાં તેઓ ફરી આત્મવિશ્વાસ સાથે રમવા લાગ્યા.

તેમણે જણાવ્યું કે સ્ટમ્પ્સની નજીક ઊભા રહી વિકેટકીપિંગ કરવાનો નિર્ણય ટીમની પૂર્વનિર્ધારિત વ્યૂહરચનાનો ભાગ હતો. વિકેટકીપર અને બોલરો સતત ચર્ચા કરીને મેદાન પર યોજના અમલમાં મૂકે છે, જેના કારણે ટીમને સફળતા મળે છે.

પોતાની બેટિંગ અંગે મૂનીએ કહ્યું કે મોટા મુકાબલાઓમાં પાવરપ્લેનો યોગ્ય ઉપયોગ કરવો ખૂબ જરૂરી હોય છે. તેમણે જ્યોર્જિયા વોલ અને ફિબી લિચફિલ્ડના ઝડપી પ્રારંભની પ્રશંસા કરતાં કહ્યું કે તેમના કારણે તેમને એક છેડો સંભાળી ટીમને જીત સુધી પહોંચાડવામાં સરળતા રહી.

બેથ મૂનીએ સમગ્ર ટૂર્નામેન્ટ દરમિયાન 7 ઇનિંગ્સમાં 142ના સ્ટ્રાઈક રેટ સાથે કુલ 238 રન બનાવ્યા હતા. ફાઇનલમાં ઇંગ્લેન્ડે પ્રથમ બેટિંગ કરતાં 20 ઓવરમાં 4 વિકેટે 150 રન બનાવ્યા હતા. તેના જવાબમાં ઓસ્ટ્રેલિયાએ 17.1 ઓવરમાં માત્ર 3 વિકેટ ગુમાવી લક્ષ્ય હાંસલ કરીને રેકોર્ડ સાતમી વખત મહિલા ટી20 વર્લ્ડ કપનો ખિતાબ પોતાના નામે કર્યો.