અમરેલી જિલ્લાના ધારી પંથકના ફતેગઢ ગામમાં સિંહોના ટોળાએ એક બળદનો શિકાર કરતાં ગ્રામજનોમાં ભય અને ચકચાર ફેલાઈ ગઈ છે. સાત સિંહો લાંબા સમય સુધી ઘટનાસ્થળે જ રોકાતા વન વિભાગની ટીમ તાત્કાલિક સ્થળ પર પહોંચી હતી. ગીર પંથકમાં સિંહોની વધતી અવરજવર પશુપાલકો માટે ચિંતાનો વિષય બની રહી છે.

ફતેગઢ ગામમાં સિંહોનું ધાડું

ધારી તાલુકાના ફતેગઢ ગામમાં મોડી રાત્રે સાત સિંહોના ટોળાએ ગામની સીમમાં ધસી આવી એક રેઢિયાર બળદને શિકાર બનાવ્યો હતો. અચાનક બનેલી આ ઘટનાથી ગામમાં ભયનો માહોલ સર્જાયો હતો.

રેઢિયાર બળદને બનાવ્યો શિકાર

સિંહોના ટોળાએ બળદ પર હુમલો કરી તેનું મારણ કર્યું હતું. પશુના મારણ બાદ પણ સિંહો લાંબા સમય સુધી ઘટનાસ્થળે જ બેઠા રહ્યા, જેના કારણે ગ્રામજનો નજીક જવાની હિંમત કરી શક્યા નહોતા.

ગ્રામજનોમાં ભય અને ચકચાર

સિંહો ગામની નજીક પહોંચતાં અને ખુલ્લેઆમ મારણ કરતાં ગ્રામજનોમાં ભારે ચિંતા જોવા મળી હતી. સ્થાનિકોએ તાત્કાલિક વન વિભાગને જાણ કરતાં અધિકારીઓ ઘટનાસ્થળે દોડી આવ્યા હતા.

વન વિભાગે શરૂ કરી કાર્યવાહી

ઘટનાની જાણ થતાં વન વિભાગની ટીમ તાત્કાલિક ફતેગઢ ગામે પહોંચી હતી. ટીમે પરિસ્થિતિનું નિરીક્ષણ કરી ગ્રામજનોને સાવચેત રહેવા સૂચના આપી હતી. સાથે જ સિંહોની હિલચાલ પર સતત નજર રાખવામાં આવી રહી છે.

ગીરી પંથકમાં સિંહોની અવરજવર વધી

તાજેતરમાં ગીર અને આસપાસના વિસ્તારોમાં સિંહોની અવરજવર વધતાં પશુપાલકોમાં ચિંતા વધી છે. વારંવાર ગામની સીમમાં સિંહો દેખાવા અને પશુઓના શિકારની ઘટનાઓ સામે આવતાં વન વિભાગ માટે પણ પડકાર ઊભો થયો છે.