અમદાવાદ: શહેરના કૃષ્ણનગર વિસ્તારમાં અકસ્માતનું નાટક કરીને કારમાંથી રૂ. 50 લાખની રોકડની ચીલઝડપની ચોંકાવનારી ઘટના સામે આવી છે. સરદાર ચોક ચાર રસ્તા પાસે એડીસી બેંક સામે બનેલી આ ઘટનાએ શહેરમાં ચકચાર મચાવી દીધી છે. પોલીસે ગુનો નોંધી આરોપીઓની શોધખોળ શરૂ કરી છે.

અકસ્માતનું નાટક કરી કારચાલકને રોક્યો
પ્રાથમિક માહિતી અનુસાર, કારમાં મોટી રકમ લઈને જઈ રહેલા વ્યક્તિની કારને પાછળથી એક બાઈક સવાર યુવકે ટક્કર મારી હતી. અકસ્માત બાદ કારચાલક નીચે ઉતરતા બંને વચ્ચે બોલાચાલી શરૂ થઈ હતી.

હેલ્મેટધારી શખ્સોએ પળવારમાં રોકડ ઉઠાવી
બોલાચાલી ચાલી રહી હતી તે દરમિયાન અન્ય એક બાઈક પર આવેલા બે હેલ્મેટધારી શખ્સોએ તકનો લાભ લીધો હતો. તેમણે કારનો કાચ તોડી અંદર રાખેલી રૂ. 50 લાખની રોકડ ભરેલી બેગ લઈને પળવારમાં ફરાર થઈ ગયા હતા.

પોલીસ માટે સૌથી મોટો સવાલ
ઘટના બાદ સૌથી મોટો સવાલ એ ઊભો થયો છે કે આરોપીઓને કારમાં રૂ. 50 લાખની રોકડ હોવાની ચોક્કસ માહિતી કેવી રીતે મળી. પોલીસ હવે એ દિશામાં તપાસ કરી રહી છે કે કારનો અગાઉથી પીછો કરવામાં આવી રહ્યો હતો કે સમગ્ર ગુનો અગાઉથી ઘડાયેલા કાવતરાનો ભાગ હતો.

CCTVના આધારે તપાસ તેજ
ઘટનાની જાણ થતાં પોલીસ કાફલો સ્થળ પર પહોંચ્યો હતો. હાલ આસપાસના સીસીટીવી કેમેરાના ફૂટેજના આધારે આરોપીઓની ઓળખ કરવાની કાર્યવાહી હાથ ધરવામાં આવી છે. પોલીસે ટૂંક સમયમાં આરોપીઓને ઝડપી પાડવાનો વિશ્વાસ વ્યક્ત કર્યો છે.