અમદાવાદમાં 149મી ઐતિહાસિક ભગવાન જગન્નાથજી રથયાત્રા પૂર્વે પરંપરાગત જળયાત્રાનો ભક્તિભાવપૂર્વક પ્રારંભ થયો છે. જમાલપુર સ્થિત મંદિરથી નીકળેલી આ જળયાત્રા સાબરમતી નદીના સોમનાથ ભૂદરના આરે પહોંચી હતી, જ્યાંથી 108 પવિત્ર કળશમાં જળ લાવી ભગવાન જગન્નાથજીનો વૈદિક વિધિ સાથે જળાભિષેક કરવામાં આવ્યો હતો. સમગ્ર રૂટ પર કડક પોલીસ બંદોબસ્ત વચ્ચે ભક્તિ અને શ્રદ્ધાનો અનોખો માહોલ જોવા મળ્યો હતો.

149મી ઐતિહાસિક રથયાત્રા પૂર્વે યોજાતી પરંપરાગત જળયાત્રાનો પ્રારંભ વહેલી સવારે જમાલપુર સ્થિત ભગવાન જગન્નાથજી મંદિરથી થયો હતો. ભગવાન જગન્નાથજી, બહેન સુભદ્રાજી અને ભાઈ બળદેવજીને શણગારેલા બળદગાડા પર બિરાજમાન કરી ભવ્ય શોભાયાત્રા કાઢવામાં આવી હતી. યાત્રામાં ગજરાજ, ઘોડાગાડીઓ, ધ્વજ-કળશ, કાવડિયા અને વિવિધ અખાડાઓના ખેલોએ ભક્તોનું વિશેષ આકર્ષણ જમાવ્યું હતું.

પરંપરા મુજબ જળયાત્રા સાબરમતી નદીના સોમનાથ ભૂદરના આરે પહોંચી હતી. અહીં મહંતો અને સાધુ-સંતોની ઉપસ્થિતિમાં વૈદિક મંત્રોચ્ચાર અને શંખનાદ વચ્ચે સાબરમતીનું પવિત્ર જળ 108 કળશમાં ભરવામાં આવ્યું હતું. ત્યારબાદ આ જળ મંદિર લાવી ભગવાન જગન્નાથજીનો વિધિવત જળાભિષેક કરવામાં આવ્યો હતો.

જળાભિષેક બાદ ભગવાન જગન્નાથજી ભક્તોને વિશેષ **'ગજવેશ'**માં દર્શન આપશે. દર વર્ષે યોજાતો આ પ્રસંગ રથયાત્રા પૂર્વેનું મહત્વનું ધાર્મિક આયોજન માનવામાં આવે છે અને મોટી સંખ્યામાં ભક્તો તેમાં જોડાય છે.

સુરક્ષા માટે ચુસ્ત બંદોબસ્ત

જળયાત્રાના સમગ્ર રૂટ પર કાયદો અને વ્યવસ્થા જળવાઈ રહે તે માટે શહેર પોલીસ દ્વારા ચુસ્ત બંદોબસ્ત ગોઠવવામાં આવ્યો હતો. 500થી વધુ પોલીસ જવાનો અને હોમગાર્ડના જવાનો તૈનાત કરવામાં આવ્યા હતા. સમગ્ર રૂટ પર સીસીટીવી અને ડ્રોન કેમેરાથી સતત નજર રાખવામાં આવી રહી હતી. અગાઉ ઉચ્ચ પોલીસ અધિકારીઓની હાજરીમાં રૂટનું ફુલ-સ્કેલ રિહર્સલ પણ કરવામાં આવ્યું હતું.

પોલીસ અને જગન્નાથ મંદિર ટ્રસ્ટના સંયુક્ત આયોજન હેઠળ યોજાયેલી આ જળયાત્રા શાંતિપૂર્ણ માહોલમાં સંપન્ન થઈ હતી. હવે અષાઢી બીજના પાવન પર્વે યોજાનારી 149મી ઐતિહાસિક રથયાત્રાને લઈને શહેરમાં ધાર્મિક ઉત્સાહનો માહોલ જોવા મળી રહ્યો છે.