Afghanistan Earthquake: શનિવારે અફઘાનિસ્તાનના હિન્દુકુશ ક્ષેત્રમાં 5.5ની તીવ્રતાનો ભૂકંપ આવ્યો હતો. પડોશી દેશ પાકિસ્તાનના અનેક શહેરોમાં પણ ભૂકંપના આંચકા અનુભવાયા છે. ઇસ્લામાબાદ, પેશાવર અને ખૈબર પખ્તુનખ્વાના અનેક વિસ્તારોમાં જમીન ધ્રુજી ઉઠતાં લોકો ડરના માર્યા પોતાના ઘરોમાંથી બહાર નીકળી ગયા હતા. સ્વાત, હંગુ, ઉત્તર વઝીરિસ્તાન અને ચિત્રાલ જેવા વિસ્તારોમાં પણ ભૂકંપના આંચકા અનુભવાયા હતા.

પાકિસ્તાન હવામાન વિભાગના જણાવ્યા અનુસાર, ભૂકંપની ઊંડાઈ આશરે 199 કિલોમીટર હતી અને તેનું કેન્દ્ર હિન્દુ કુશ ક્ષેત્રમાં હતું. તેની ઊંડાઈ વધુ હોવાથી નુકસાન ઓછું થયું હતું. સદનસીબે, અત્યાર સુધી જાનમાલના નુકસાનના કોઈ અહેવાલ નથી.

વહીવટીતંત્રે પુષ્ટિ આપી છે કે, પરિસ્થિતિ સામાન્ય છે. જો કે, આ વિસ્તારમાં અગાઉ ઘણી વખત ભૂકંપના આંચકા અનુભવાયા છે. આ મહિને તાજેતરમાં 6.1ની તીવ્રતાનો ભૂકંપ આવ્યો હતો અને ફેબ્રુઆરીમાં 5.8ની તીવ્રતાનો ભૂકંપ પણ અનુભવાયો હતો. 

નિષ્ણાતોના મતે, પાકિસ્તાન અને આસપાસનો પ્રદેશ ભારતીય અને યુરેશિયન ટેક્ટોનિક પ્લેટો વચ્ચે આવેલો છે, જેના કારણે તેને ભૂકંપનો સતત ભય રહે છે.