PM Modi German Chancellor Meeting: 
ફ્રાન્સના એવિયન શહેરમાં યોજાયેલી G7 સમિટ 2026 દરમિયાન વડાપ્રધાન નરેન્દ્ર મોદી અને જર્મનીના ચાન્સેલર ફ્રેડરિક મર્ઝ વચ્ચે મહત્વપૂર્ણ બેઠક યોજાઈ હતી. વર્ષ 2026માં બંને નેતાઓ વચ્ચેની આ બીજી મુલાકાત હતી, જેમાં વેપાર, રોકાણ, રક્ષા સહયોગ, ટેક્નોલોજી, ગ્રીન ડેવલપમેન્ટ અને સાંસ્કૃતિક સંબંધો જેવા અનેક મહત્વના મુદ્દાઓ પર ચર્ચા કરવામાં આવી હતી. વડાપ્રધાન મોદીએ બેઠક બાદ જણાવ્યું કે જર્મન ચાન્સેલર સાથેની ચર્ચા ખૂબ જ સકારાત્મક અને ઉપયોગી રહી. બંને દેશો વચ્ચે વેપાર, રોકાણ, સર્ક્યુલર ઇકોનોમી, રક્ષા, માહિતી ટેક્નોલોજી સહિતના ક્ષેત્રોમાં સહકાર વધારવા માટે સહમતિ વ્યક્ત કરવામાં આવી.

ભારત-જર્મની વ્યૂહાત્મક ભાગીદારીને નવી ગતિ
બેઠક દરમિયાન બંને નેતાઓએ ભારત-જર્મની વ્યૂહાત્મક ભાગીદારીની પ્રગતિની સમીક્ષા કરી હતી. બંને દેશો હાલમાં રાજદ્વારી સંબંધોના 75 વર્ષ પૂર્ણ થવાના અવસરની ઉજવણી કરી રહ્યા છે. આ પ્રસંગે બંને દેશોએ ભવિષ્યમાં સહયોગને વધુ વિસ્તૃત બનાવવાનો સંકલ્પ વ્યક્ત કર્યો.

ભારત-EU FTA પર પણ ચર્ચા
ચર્ચા દરમિયાન ભારત અને યુરોપિયન યુનિયન વચ્ચેના મુક્ત વેપાર કરાર (FTA)ને ઝડપથી પૂર્ણ કરવાની જરૂરિયાત પર ભાર મૂકવામાં આવ્યો હતો. બંને નેતાઓએ માન્યું કે આ કરાર ભારત અને જર્મની વચ્ચેના આર્થિક સંબંધોને વધુ મજબૂત બનાવશે.

રક્ષા અને ટેક્નોલોજી ક્ષેત્રે સહયોગ વધશે
બંને દેશોએ રક્ષા ઉદ્યોગ સહયોગ, ગ્રીન ટેક્નોલોજી, ઇનોવેશન, શિક્ષણ, સ્કિલ ડેવલપમેન્ટ અને યુવાનોની અવરજવર જેવા ક્ષેત્રોમાં ભાગીદારીને નવી ઊંચાઈએ લઈ જવાની પ્રતિબદ્ધતા વ્યક્ત કરી હતી.

વૈશ્વિક મુદ્દાઓ પર પણ વિચારવિમર્શ
બેઠક દરમિયાન પશ્ચિમ એશિયાની સ્થિતિ, રશિયા-યુક્રેન સંઘર્ષ અને વૈશ્વિક સુરક્ષા સંબંધિત મુદ્દાઓ પર પણ ચર્ચા થઈ હતી. બંને નેતાઓએ પશ્ચિમ એશિયામાં શાંતિ સ્થાપિત કરવા માટે થયેલી તાજેતરની સહમતિનું સ્વાગત કર્યું.

જર્મનીની મુલાકાત માટે PM મોદીને આમંત્રણ
ચાન્સેલર ફ્રેડરિક મર્ઝે વડાપ્રધાન મોદીને વર્ષના અંતમાં જર્મનીમાં યોજાનારી 8મી ભારત-જર્મની આંતર-સરકારી પરામર્શ બેઠક (IGC)માં ભાગ લેવા માટે સત્તાવાર આમંત્રણ પણ આપ્યું હતું.