Moscow Drone Attack: રશિયાની રાજધાની મોસ્કો પર યુક્રેને જોરદાર હુમલો કર્યો છે. મોસ્કોમાં ઘણી ઇમારતોમાંથી જ્વાળાઓ અને ધુમાડા નીકળી રહ્યા છે. આ હુમલામાં રશિયન તેલ રિફાઇનરીઓ પર હુમલો કરવામાં આવ્યો હતો અને એરપોર્ટ પરથી ફ્લાઇટ્સ અટકાવી દેવામાં આવી હતી. રશિયન અધિકારીઓએ ગુરુવારે જણાવ્યું હતું કે યુક્રેને એક અઠવાડિયામાં બીજી વખત મોસ્કો ઓઇલ રિફાઇનરી પર હુમલો કર્યો હતો અને મોસ્કો એરપોર્ટ પર વાણિજ્યિક ફ્લાઇટ્સ અટકાવી દીધી હતી. ચાર વર્ષ પહેલાં રશિયન હુમલા પછી યુક્રેનમાં થયેલા આ સૌથી મોટા ડ્રોન હુમલાઓમાંનો એક હતો. તેલ રિફાઇનરીમાં એક પ્રચંડ વિસ્ફોટ થયો હતો અને આગની જ્વાળાઓ આકાશમાં ઉંચી જોવા મળી હતી.

રશિયાના સંરક્ષણ મંત્રાલયે જણાવ્યું હતું કે તેની હવાઈ સંરક્ષણ પ્રણાલીઓએ રાતોરાત અનેક વિસ્તારોમાં 555 યુક્રેનિયન ડ્રોનને તોડી પાડ્યા હતા, જેમાંથી લગભગ 200 ડ્રોનને રશિયન રાજધાની નજીક પહોંચતા અટકાવી દેવામાં આવ્યા હતા. જોકે, ઘણા ડ્રોન શહેરને નિશાન બનાવવામાં સફળ રહ્યા. મોસ્કોમાં રશિયાની હવાઈ એર ડિફેન્સ સિસ્ટમ તે બધાને અટકાવવામાં નિષ્ફળ ગઈ. ડ્રોન હુમલાથી સદોવોડના પ્રદેશ, બેલાયા ડાચા જેવા શોપિંગ કોમ્પ્લેક્સ અને કેટલીક રહેણાંક ઇમારતોને નુકસાન થયું હતું. અનેક સ્થળોએ ભારે આગ લાગી હતી. યુક્રેનિયન રાષ્ટ્રપતિ ઝેલેન્સકીએ ટ્વિટર પર હુમલાના વીડિયો પોસ્ટ કર્યા હતા. મોસ્કોના મેયર સેરગેઈ સોબ્યાનિને જણાવ્યું હતું કે શહેરના દક્ષિણપૂર્વીય બહારના વિસ્તારમાં મોસ્કો ઓઇલ રિફાઇનરીમાં ઘણા ડ્રોનથી હુમલો થયો હતો. રશિયાના પરિવહન મંત્રાલયે જણાવ્યું હતું કે મોસ્કોના ચાર એરપોર્ટ પર ફ્લાઇટ્સ સ્થગિત કરવામાં આવી છે.

આ હુમલાથી મોસ્કોમાં ગેઝપ્રોમ નેફ્ટ ઓઇલ રિફાઇનરી સૌથી વધુ પ્રભાવિત થઈ હતી, અને તે મોસ્કો ક્ષેત્રનો સૌથી મોટો ઇંધણ પ્લાન્ટ છે. 16 જૂનના રોજ થયેલા પહેલા હુમલા પછી, 18 જૂનના રોજ બીજો હુમલો થયો. સ્ટોરેજ ટાંકી, એક ક્રૂડ ઓઇલ પ્રોસેસિંગ યુનિટ અને એક ડીઝલ હાઇડ્રોટ્રીટિંગ યુનિટને નુકસાન થયું. હુમલા પછી ભીષણ આગ ફાટી નીકળી, જેના કારણે સમગ્ર શહેરમાં કાળો ધુમાડો છવાઈ ગયો. મોસ્કોના ચારેય મુખ્ય એરપોર્ટ: શેરેમેટ્યેવો, ડોમોડેડોવો અને વનુકોવો પર ફ્લાઇટ્સ અસ્થાયી રૂપે સ્થગિત કરવામાં આવી હતી. સેંકડો ફ્લાઇટ્સને અસર થઈ હતી. ધુમાડા અને વિસ્ફોટોના અવાજથી સમગ્ર શહેરમાં ગભરાટ ફેલાયો હતો, જેના કારણે રાજધાની મોસ્કોના ઘણા વિસ્તારો દિવસ દરમિયાન અંધારામાં ડૂબી ગયા હતા.

ઝેલેન્સકીના નિવેદન પછી હુમલો થયો હતો
યુક્રેનના રાષ્ટ્રપતિ વોલોડીમીર ઝેલેન્સકીએ કહ્યું હતું કે તેમણે યુએસ રાષ્ટ્રપતિ ડોનાલ્ડ ટ્રમ્પ અને ફ્રાન્સના રાષ્ટ્રપતિ ઇમેન્યુઅલ મેક્રોન સાથે "એક મહત્વપૂર્ણ સંકલન કોલ" કર્યો છે જેનાથી "મોટા ફેરફારો" થઈ શકે છે તેના કલાકો પછી આ હુમલો થયો. ઝેલેન્સકીએ બુધવારે કહ્યું હતું કે તેમના દેશને ફ્રાન્સમાં G7 સમિટમાં હાજરી આપનારા વિશ્વ નેતાઓ તરફથી વધુ સહાયનું નોંધપાત્ર વચન મળ્યું છે.