જામનગર જામનગર જિલ્લાના કાલાવડ તાલુકાના સતીયા ગામમાં પ્રેમ સંબંધની અદાવતને લઈને ગંભીર હિંસક ઘટના બની હતી. આ વિવાદ મોડી રાત્રે હિંસક અથડામણમાં ફેરવાઈ જતા સમગ્ર વિસ્તારમાં તણાવનો માહોલ સર્જાયો હતો.

મળતી માહિતી મુજબ, સાત જેટલી કારમાં આવેલા હથિયારધારી શખ્સોએ ગામમાં ઘૂસી ભારે આતંક મચાવ્યો હતો. ટોળાએ ગામમાં ગાળો બોલી અને ભયનો માહોલ ઉભો કર્યો હતો, જેના કારણે સ્થાનિક લોકોમાં દહેશત ફેલાઈ ગઈ હતી.

આ બનાવ દરમિયાન એક મહિલાને ગંભીર ઈજાઓ પહોંચી હતી. ફરિયાદ મુજબ, યુવતી પક્ષના લોકો અને તેમના સાગરીતો દ્વારા હથિયારો સાથે ગામમાં હુમલો કરવામાં આવ્યો હતો.

આક્ષેપ મુજબ મુખ્ય આરોપી ભરતભાઈ ઝાપડાએ મહિલાના માથામાં લોખંડના પાઇપથી હુમલો કર્યો હતો, જેના કારણે મહિલા ગંભીર રીતે ઘાયલ થઈ હતી.

ઘટના બાદ કાલાવડ ગ્રામ્ય પોલીસે તાત્કાલિક કાર્યવાહી શરૂ કરી છે. પોલીસે નામજોગ તેમજ અજાણ્યા મળી કુલ આશરે 22 શખ્સો સામે હત્યાના પ્રયાસ સહિતની ગંભીર કલમો હેઠળ ગુનો નોંધ્યો છે.

પોલીસે આરોપીઓને ઝડપી પાડવા માટે તપાસ તેજ કરી છે અને સમગ્ર મામલાની વધુ તપાસ ચાલી રહી છે.