તિરુવનંતપુરમ: V. D. Satheesan કેરળના આગામી મુખ્યમંત્રી બનશે. કોંગ્રેસ પાર્ટીએ ગુરુવારે વિધાનસભા ચૂંટણીના પરિણામો જાહેર થયાના 10 દિવસ બાદ તેમના નામની સત્તાવાર જાહેરાત કરી હતી. સતીશન હાલ પારાવુર બેઠક પરથી ધારાસભ્ય તરીકે ચૂંટાયેલા છે.

કેરળના મુખ્યમંત્રી પદ માટે K. C. Venugopal, Ramesh Chennithala અને વીડી સતીશનના નામોની ચર્ચા ચાલી રહી હતી. અંતે કોંગ્રેસ હાઈકમાન્ડે વીડી સતીશનના નામ પર મહોર લગાવી છે.

રાજકીય વર્તુળોમાં એવી ચર્ચા હતી કે અલપ્પુઝા બેઠક પરથી લોકસભા સાંસદ કેસી વેણુગોપાલ Rahul Gandhiની પ્રથમ પસંદગી હતા. રાહુલ ગાંધીએ 11 મેના રોજ દિલ્હીમાં વેણુગોપાલ સાથે બેઠક પણ કરી હતી.

કોટ્ટાયમના ધારાસભ્ય રાધાકૃષ્ણને મીડિયા સાથે વાત કરતાં જણાવ્યું હતું કે કોંગ્રેસ હાઈકમાન્ડે તમામ પક્ષોના મંતવ્યો સાંભળ્યા બાદ અંતિમ નિર્ણય લીધો હતો. તેમણે જણાવ્યું કે સમગ્ર પ્રક્રિયામાં રાહુલ ગાંધી સીધા રીતે જોડાયેલા હતા અને લોકતાંત્રિક પદ્ધતિથી નેતાની પસંદગી કરવામાં આવી હતી.

9 મેના રોજ દિલ્હીમાં Mallikarjun Khargeના નિવાસસ્થાને કેરળ કોંગ્રેસના નેતાઓની મહત્વપૂર્ણ બેઠક યોજાઈ હતી, જેમાં મુખ્યમંત્રી પદ અંગે ચર્ચા થઈ હતી.

ઉલ્લેખનીય છે કે કેરળ વિધાનસભા ચૂંટણીમાં UDF ગઠબંધને 140માંથી 102 બેઠકો જીતીને ભવ્ય જીત નોંધાવી છે. જેમાં કોંગ્રેસે એકલા 63 બેઠકો મેળવી છે.

રિપોર્ટ મુજબ કોંગ્રેસ ધારાસભ્યોની બેઠકમાં 75થી 80 ટકા ધારાસભ્યોએ કેસી વેણુગોપાલને સમર્થન આપ્યું હતું, જ્યારે વીડી સતીશનને માત્ર 6 ધારાસભ્યોનું સમર્થન મળ્યું હોવાનું કહેવાય છે. તેમ છતાં, બાદમાં કોંગ્રેસના ત્રણ પૂર્વ પ્રદેશ અધ્યક્ષો તેમજ UDFના સહયોગી પક્ષો IUML અને કેરળ કોંગ્રેસ (જોસેફ) એ સતીશનના નામને સમર્થન આપ્યું હતું.