લોસ એન્જેલિસ: કેલિફોર્નિયાના ગવર્નર ગેવિન ન્યૂસમએ ઓરેન્જ કાઉન્ટીમાં સ્ટેટ ઓફ ઇમરજન્સી જાહેર કરી છે કારણ કે ગાર્ડન ગ્રોવમાં આવેલી એક એરોસ્પેસ મેન્યુફેક્ચરિંગ ફેક્ટરીમાં ખતરનાક કેમિકલ ટાંકી સાથે ગંભીર સ્થિતિ સર્જાઈ છે.

ગવર્નર ન્યૂસમના જણાવ્યા મુજબ, “ઓરેન્જ કાઉન્ટીના લોકોની સુરક્ષા અમારી સર્વોચ્ચ પ્રાથમિકતા છે” અને રાજ્યની તમામ સંભવિત સંસાધનો રાહત કામગીરી માટે ઉપયોગમાં લેવામાં આવી રહ્યા છે.

તેમણે સોશિયલ મીડિયા પ્લેટફોર્મ ‘X’ પર લખ્યું કે રાજ્ય સરકાર સ્થાનિક અને ફેડરલ એજન્સીઓ સાથે મળીને અસરગ્રસ્ત વિસ્તારોમાં મદદ કરી રહી છે અને લોકોને ઇમરજન્સી અધિકારીઓના સૂચનોનું પાલન કરવા જણાવ્યું છે.

આ ઇમરજન્સી ઓર્ડર બાદ રાજ્ય સરકાર વધુ સંસાધનો ઝડપથી મોકલી શકશે અને વિવિધ એજન્સીઓ વચ્ચે સંકલન વધુ મજબૂત બનશે.

આ સંકટ ગાર્ડન ગ્રોવ સ્થિત GKN એરોસ્પેસ પ્લાન્ટમાં સર્જાયો છે, જ્યાં મિથાઇલ મેથાક્રિલેટ (MMA) નામના અત્યંત જ્વલનશીલ કેમિકલથી ભરેલો ટાંકી સમસ્યાગ્રસ્ત બન્યો છે.

રિપોર્ટ અનુસાર છેલ્લા કેટલાક દિવસોથી આ ટાંકીનું તાપમાન અસ્થિર છે અને સતત વધતું જઈ રહ્યું છે.

એક દિવસ પહેલા તાપમાન 77°F (25°C) હતું, જે હવે વધીને લગભગ 90°F (32.2°C) સુધી પહોંચી ગયું છે.

ફાયર અધિકારીઓએ ચેતવણી આપી છે કે જો તાપમાન વધતું રહેશે તો ટાંકી ફાટવાનો અથવા જોરદાર વિસ્ફોટ થવાનો ખતરો છે, જેના કારણે આસપાસના અન્ય કેમિકલ ટાંકી પણ જોખમમાં આવી શકે છે.