કચ્છ: કચ્છ જિલ્લાના કંડલા પોર્ટ પર માર્શલ આઇલેન્ડ્સના ધ્વજવાળા એલપીજી ટેન્કર ‘સાઈમી’નું સફળ આગમન થયું છે. આ જહાજમાં અંદાજે 20,000 ટન લિક્વિફાઇડ પેટ્રોલિયમ ગેસ (LPG) ભરાયેલો હતો, જે પર્સિયન ગલ્ફને આંતરરાષ્ટ્રીય શિપિંગ માર્ગો સાથે જોડતા મહત્વપૂર્ણ અને સંવેદનશીલ હોર્મુઝ જળમાર્ગને સલામત રીતે પાર કરીને 13 મેના રોજ ભારત તરફ આવ્યું હતું.

વિશ્વભરમાં હાલ હોર્મુઝ જળમાર્ગમાં જહાજોની સુરક્ષા અને ગતિશીલતા પર ખાસ નજર રાખવામાં આવી રહી છે, ત્યારે ભારત માટે આ આગમન મહત્વપૂર્ણ માનવામાં આવે છે.

બંદર, શિપિંગ અને જળમાર્ગ મંત્રાલયે માહિતી આપી છે કે ભારત માટે આવતા બે એલપીજી કેરિયર જહાજોએ હોર્મુઝ જળમાર્ગ સુરક્ષિત રીતે પાર કર્યો છે. ઇન્ટર-મિનિસ્ટ્રિયલ બેઠકમાં વધારાના સચિવ મુકેશ મંગલે જણાવ્યું કે આ બંને જહાજો ઇન્ડિયન ઓઇલ કોર્પોરેશન (IOC) સાથે સંકલન કરીને ચલાવવામાં આવ્યા હતા, જેથી તેમનો ટ્રાન્ઝિટ સંપૂર્ણ સુરક્ષિત રહી શકે.

આ વચ્ચે વિદેશ મંત્રી એસ. જયશંકર સાથેની ચર્ચામાં ઈરાનના વિદેશ મંત્રી સૈયદ અબ્બાસ અરાઘચીએ જણાવ્યું કે મિત્ર દેશો વ્યાપારી જહાજોની સુરક્ષા માટે ઈરાન પર વિશ્વાસ રાખી શકે છે. તેમણે એક સોશિયલ મીડિયા પોસ્ટમાં જણાવ્યું કે ઈરાન હોર્મુઝ જળમાર્ગની સુરક્ષા જાળવવાની પોતાની “ઐતિહાસિક જવાબદારી” ચાલુ રાખશે અને સુરક્ષિત વેપાર માટે વિશ્વસનીય ભાગીદાર તરીકે કામ કરશે.