Vaibhav Suryavanshi Debut Record: ભારતીય ક્રિકેટને વધુ એક યુવા સ્ટાર મળી ગયો છે. માત્ર 15 વર્ષ અને 99 દિવસની ઉંમરે વૈભવ સૂર્યવંશીએ ભારત માટે આંતરરાષ્ટ્રીય ક્રિકેટમાં ડેબ્યૂ કરીને નવો ઈતિહાસ રચ્યો છે. ઇંગ્લેન્ડ સામે રમાયેલી ટી20 શ્રેણીની બીજી મેચમાં મેદાન પર ઉતરતાં જ વૈભવ ભારત તરફથી સૌથી ઓછી ઉંમરે આંતરરાષ્ટ્રીય ક્રિકેટ રમનાર ખેલાડી બની ગયો. ઓલ્ડ ટ્રાફર્ડ ખાતે રમાયેલી મેચ પહેલા ઉપકપ્તાન તિલક વર્માએ વૈભવને ડેબ્યૂ કેપ અર્પણ કરી હતી. આ સાથે તે ભારત માટે ટી20 આંતરરાષ્ટ્રીય ક્રિકેટ રમનાર 122મો ખેલાડી બન્યો.

વૈભવે આ સિદ્ધિ સાથે ભારતીય ક્રિકેટના દિગ્ગજ સચિન તેંડુલકરનો લાંબા સમયથી અખંડ રહેલો રેકોર્ડ તોડી નાખ્યો છે. સચિને 1989માં પાકિસ્તાન સામે 16 વર્ષ અને 205 દિવસની ઉંમરે આંતરરાષ્ટ્રીય ક્રિકેટમાં ડેબ્યૂ કર્યું હતું. હવે વૈભવ તેના કરતાં પણ ઓછી ઉંમરે ભારતીય ટીમનું પ્રતિનિધિત્વ કરનાર ખેલાડી બની ગયો છે. માત્ર પુરુષ ક્રિકેટ જ નહીં, પરંતુ સમગ્ર ભારતીય ક્રિકેટના ઇતિહાસમાં પણ વૈભવ સૌથી યુવા આંતરરાષ્ટ્રીય ડેબ્યૂ કરનાર ખેલાડી બન્યો છે. અગાઉ મહિલા ક્રિકેટમાં આ રેકોર્ડ શેફાલી વર્માના નામે હતો, જેમણે 15 વર્ષ અને 239 દિવસની ઉંમરે ભારત માટે ડેબ્યૂ કર્યું હતું.

IPLમાં ધમાકેદાર પ્રદર્શનથી મળી ઓળખ
વૈભવ સૂર્યવંશીનું નામ IPL 2026 દરમિયાન ચર્ચામાં આવ્યું હતું. રાજસ્થાન રોયલ્સ તરફથી રમતા તેણે આક્રમક બેટિંગથી સૌનું ધ્યાન ખેંચ્યું હતું. સમગ્ર સીઝનમાં તેણે 776 રન ફટકાર્યા હતા અને 237.30ના સ્ટ્રાઈક રેટ સાથે અનેક રેકોર્ડ પોતાના નામે કર્યા હતા.

લિસ્ટ-A ક્રિકેટમાં પણ બનાવ્યો વર્લ્ડ રેકોર્ડ
IPL બાદ વૈભવને ઈન્ડિયા-એ ટીમમાં સ્થાન મળ્યું હતું. શ્રીલંકામાં યોજાયેલી ત્રિકોણીય શ્રેણીના ફાઇનલમાં તેણે માત્ર 11 બોલમાં અડધી સદી ફટકારી હતી. લિસ્ટ-A ક્રિકેટના ઇતિહાસમાં આ સૌથી ઝડપી ફિફ્ટી તરીકે નોંધાઈ હતી.

ભારતીય ક્રિકેટનો આગામી સુપરસ્ટાર?
ક્રિકેટ નિષ્ણાતો અને પૂર્વ ખેલાડીઓ વૈભવની પ્રતિભાની પ્રશંસા કરી રહ્યા છે. માત્ર 15 વર્ષની ઉંમરે જે રીતે તેણે એક પછી એક સિદ્ધિઓ હાંસલ કરી છે તે જોતા ભારતીય ક્રિકેટને ભવિષ્યનો એક મોટો સ્ટાર મળી ગયો હોવાનું માનવામાં આવે છે. ભારતીય ક્રિકેટપ્રેમીઓ હવે આશા રાખી રહ્યા છે કે વૈભવ સૂર્યવંશી આગામી વર્ષોમાં ટીમ ઈન્ડિયા માટે અનેક યાદગાર ઇનિંગ્સ રમીને વિશ્વ ક્રિકેટમાં પોતાની આગવી ઓળખ બનાવશે.