અમદાવાદ: અમદાવાદના સાબરમતી વિસ્તારમાં ધોળા દિવસે બનેલી અપહરણની ઘટનાએ શહેરમાં હલચલ મચાવી દીધી છે. ક્રેટા કારમાં આવેલા ચાર લોકોએ યુવતીનું અપહરણ કર્યું હોવાનું સામે આવ્યું છે. આ ઘટનામાં કારમાં ત્રણ યુવક અને એક યુવતી પણ હાજર હોવાનું ફરિયાદમાં નોંધાયું છે.

મળતી વિગતો મુજબ આરોપીઓ સીધા જ રહેણાંક વિસ્તારમાં પહોંચી ગયા હતા અને યુવતીના ઘરમાં ઘૂસીને સાસુની હાજરીમાં જ વહુનું અપહરણ કરી ફરાર થઈ ગયા હતા. આ ઘટનાને કારણે પરિવારજનોમાં ભારે ભય અને આક્રોશનો માહોલ જોવા મળ્યો હતો.

પ્રાથમિક માહિતી અનુસાર આ સમગ્ર ઘટનામાં યુવતીનો પૂર્વ પ્રેમી સંડોવાયેલો હોવાનો અનુમાન વ્યક્ત કરવામાં આવી રહ્યું છે. જોકે પોલીસ દ્વારા આ બાબતે કોઈ સત્તાવાર પુષ્ટિ કરવામાં આવી નથી અને તમામ દિશામાં તપાસ ચાલી રહી છે.

ઘટના બાદ સ્થાનિક પોલીસ તાત્કાલિક ઘટનાસ્થળે પહોંચી હતી અને આસપાસના વિસ્તારના CCTV ફૂટેજ એકત્ર કરવાની કામગીરી શરૂ કરી છે. તેમજ કારના રૂટ અને આરોપીઓની ઓળખ માટે અલગ અલગ ટીમો બનાવવામાં આવી છે.

પોલીસે અપહરણનો ગુનો નોંધીને કાનૂની કાર્યવાહી હાથ ધરી છે અને ટૂંક સમયમાં આરોપીઓ સુધી પહોંચવાનો દાવો કર્યો છે. આ ઘટનાએ ફરી એકવાર શહેરની સુરક્ષા વ્યવસ્થાને લઈને પ્રશ્નો ઊભા કર્યા છે.